ტრამპის დამოკიდებულება, რომ ყირიმი რუსეთისაა, ძალიან სახიფათო პრეცედენტია - ვერცერთი სერიოზული მოთამაშე ამას მხარს ვერ დაუჭერს, - ამის შესახებ „სტრატეგიული ანალიზის ცენტრის“ გეოპოლიტიკური კვლევების ხელმძღვანელმა ვალერი ჩეჩელაშვილმა განაცხადა, რითაც აშშ-ის პრეზიდენტის, დონალდ ტრამპის განცხადებას გამოეხმაურა იმის შესახებ, რომ „ყირიმი რუსეთს დარჩება“.

როგორც ვალერი ჩეჩელაშვილმა „პალიტრანიუსის“ გადაცემაში „რეზიუმე“ განაცხადა, დონალდ ტრამპი რთულ ვითარებაშია, რადგან მას ახლა ძალიან ესაჭიროება გამარჯვება და პროგრესი, მაგრამ მისი პოლიტიკის შედეგად მიღწეული რაიმე პროგრესი ძალიან რთული დასანახია.

„ამერიკა არის გლობალური მოთამაშე ნომერი - 1. ამერიკა დიადი ვერ გახდება, თუ არ შეინარჩუნა გლობალური მოთამაშე ნომერი 1-ის როლი. ახლა კი გამოდის, რომ რუსეთ-უკრაინის ომის საკითხში, რომელი ბარბაროსული ომიც რუსეთმა წამოიწყო, ამერიკა, როგორც გლობალური მოთამაშე ნომერი 1 უთმობს რუსეთს, რომელიც არის გლობალური მოთამაშე შეიძლება მე-4 ან მე-5.

აშშ-მა თუ დაკარგა გლობალურ ურთიერთობათა სისტემაში საკუთარი გავლენები და თუ ის ჩაანაცვლა რუსეთმა და ჩინეთმა, უფრო ევროპა ჩაანაცვლებს, მაგრამ მე ვფიქრობ, ნებისმიერ შემთხვევაში განვითარების ამ კონტექსტში აშშ ვერ გახდება დიადი, რაც პრეზიდენტ ტრამპის მთავარი იდეაა.

ტრამპი რთულ ვითარებაშია იმიტომ, რომ ძალიან ესაჭიროება გამარჯვება და პროგრესი. ახლა ძალიან რთული დასანახია მისი პოლიტიკის შედეგად მიღწეული რაიმე პროგრესი, იქნება ეს სატარიფო ომები თუ დაპირისპირება ევროკავშირთან. ხშირად ამბობენ, რომ ეს პოლიტიკა მიმართულია იმისკენ, რომ გამოსტაცოს რუსეთი ჩინეთს და დაიახლოოს. ჯერ ერთი, ისეთი არაპროგნოზირებადი პარტნიორი, როგორიც რუსეთია, რაში ჭირდება ამერიკას, მაგრამ იმის მაგივრად, რომ რუსეთი გამოგლიჯოს ჩინეთს, ევროკავშირს უბიძგებს ჩინეთისკენ. ამ სატარიფო ომების შედეგებიდან ასე გამოდის“, - განაცხადა ვალერი ჩეჩელაშვილმა.