თუ ასეთი მინავლებულია პროტესტი, ამიტომ არის გაგიჟებული არალეგიტიმური პარლამენტი და ყოველ კვირას ახალ კანონს აცხობს?, - ამის შესახებ კოალიცია “ლელო - ძლიერი საქართველოს” წევრმა ანა ნაცვლიშვილმა “პალიტრანიუსის” გადაცემა “360 გრადუსში” განაცხადა.

ნაცვლიშვილის თქმით, “ქართული ოცნება”, შესაძლოა, განიხილავდეს ვერსიას, როდის იქნება მისთვის იდეალური მომენტი ახალი საპარლამენტო არჩევნების დასანიშნად.

“აქ ძალიან დიდი განსხვავებაა ორ სცენარს შორის - როდესაც “ქართული ოცნება” თავისი კალკულაციითა და მისთვის იდეალურ მომენტში ნიშნავს არჩევნებს და როდესაც საზოგადოებრივი ზეწოლით იძულებულია, დანიშნოს არჩევნები. ჩვენ ვმუშაობთ იმისთვის კი არა, რომ “ქართულმა ოცნებამ” თავისთვის იდეალურ მომენტში გადაწყვიტოს და ჩაატაროს არჩევნები. ის შესაძლოა განიხილავდეს ამ ვერსიებს, როდის იქნება მისთვის ყველაზე იდეალური მომენტი.

ჩვენ რა გვინდა, მე რა მინდა როგორც მოქალაქეს და რისთვის დგას ხალხი ქუჩაში. ხალხი ქუჩაში დგას იმისთვის, რომ დიდი წნეხი შეიქმნას ქვეყანაში და ფართოა ეს პროტესტი.

ზოგჯერ უფრო იმედიანად, ზოგჯერ უფრო ნაკლებ იმედიანად არიან ხოლმე ადამიანები - ეს დამოკიდებულია საერთაშორისო გამოხმაურებებზე, პროტესტის რაოდენობაზე და ა.შ. მაგრამ დიდ სურათში მთავარი ამბავი არის ის, რომ სადაც არ უნდა წახვიდეთ, ეს პროტესტი დუღს. რუსთაველი არის უმნიშვნელოვანესი, მაგრამ მხოლოდ ერთი გამოვლინება ამ პროტესტის. ამიტომ არის, რომ ყოველ კვირა ახალ და კიდევ უფრო რეპრესიული კანონების მიღებას ცდილობენ. როგორ გვგონია, ასეთი მინავლებული თუ არის პროტესტი, ამიტომ არის გაგიჟებული არალეგიტიმური პარლამენტი და ყოველ კვირას ახალ კანონს აცხობს? არა, მათ ზუსტად იციან, რომ საზოგადოებაში მათი მიმღებლობა არის უკიდურესად შემცირებული, მათ შორის, 26 ოქტომბრის შემდეგ”, - განაცხადა ანა ნაცვლიშვილმა.