რუმინეთის საოლქო სააპელაციო სასამართლომ საპრეზიდენტო არჩევნების შედეგების გაბათილების გაუქმების შესახებ გადაწყვეტილება მიიღო. ამის შესახებ ინფორმაციას გამოცემა The Guardian ავრცელებს.

კერძოდ, ქალაქ პლოიეშტის საოლქო სააპელაციო სასამართლომ ხელახალ საპრეზიდენტო არჩევნებამდე 9 დღით ადრე გადაწყვეტილება გამოიტანა, რომ საკონსტიტუციო სასამართლოს მიერ 2024 წლის საპრეზიდენტო არჩევნების გაბათილების შესახებ გადაწყვეტილება თავად უნდა იქნას გაბათილებული.

ცნობისთვის, ხელახალი საპრეზიდენტო არჩევნების ჩატარება რუმინეთში 4 მაისს (პირველი რაუნდი) და 18 მაისს (მეორე რაუნდი) იგეგმება.

რუმინეთის ცენტრალურმა საარჩევნო ბიურომ აღნიშნა, რომ ქალაქ პლოიეშტის საოლქო სააპელაციო სასამართლოს გადაწყვეტილება გავლენას არ იქონიებს ხელახალ ორრაუნდიან არჩევნებზე, ხოლო იურიდიული ექსპერტები აღნიშნავენ, რომ საკონსტიტუციო სასამართლოს გადაწყვეტილებები საბოლოოა.