გრიგოლ გეგელია - პარტია, რომელიც ხალხის მიერ აიკრძალება პოლიტიკური კუთხით, ეს კრიმინალურ ბანდად ფორმირებული „ქართული ოცნებაა“ - ოპოზიციურ პარტიებს მხარს უჭერს ქვეყნის სულ მცირე 1/3 და მათი აკრძალვა დიქტატურის გამოცხადებას ნიშნავს
პარტია, რომელიც აიკრძალება ხალხის მიერ პოლიტიკური კუთხით, ეს არის კრიმინალურ ბანდად ფორმირებული „ქართული ოცნება“,- ამის შესახებ „ლელო-ძლიერი საქართველოს“ ერთ-ერთმა ლიდერმა, გრიგოლ გეგელიამ განაცხადა, რითაც შეაფასა საკანონმდებლო პაკეტი, რომელიც პოლიტიკური პარტიების აკრძალვას ითვალისწინებს.
გრიგოლ გეგელიას თქმით, ოპოზიციურ პარტიებს მილიონზე მეტი ადამიანი უჭერს მხარს, ხოლო მათი აკრძალვის გამოცხადება ოფიციალურად დიქტატურის გამოცხადებას ნიშნავს.
„ეს ნიშნავს იმას, რაც ივანიშვილმა დაგვიანონსა 2024 წლის აპრილში, როდესაც განაცხადა, რომ ის აპირებდა პოლიტიკური პარტიების აკრძალვას. ეს არის დიქტატორის ანონსი. ვიცით, რომ ამ ოპოზიციურ პარტიებს მილიონზე მეტი ადამიანი უჭერს მხარს. შესაბამისად, სულ მცირე ქვეყნის 1/3 რომ უჭერს მხარს პარტიებს, მათი აკრძალვის გამოცხადება ოფიციალურად დიქტატურის გამოცხადებას ნიშნავს. ეს ვერასდროს მოხდება. პარტია რომელიც აიკრძალება ხალხის მიერ პოლიტიკური კუთხით. ეს არის კრიმინალურ ბანდად ფორმირებული „ქართული ოცნება“,- აღნიშნა გეგელიამ.
გარდა ამისა, მან საქართველოს პარლამენტის დროებით საგამოძიებო კომისიაზეც ისაუბრა და აღნიშნა, რომ ეს პოლიტიკური ოპონენტების დასჯის კიდევ ერთი ინსტრუმენტია.
„ეს არის სამარცხვინო კომისია, რომლის ერთადერთი ფუნქციაც არის პოლიტიკური სადამსჯელო სპეცოპერაციის განხორციელება. ასევე ქართული სახელმწიფოს გასამართლება. ეს კომისია მიზნად არ ისახავს სიმართლის დადგენას, ეს არის ფარსი, პიარული ტრიუკია“,- აღნიშნა გეგელიამ.
