მარკო რუბიომ ინდოეთსა და პაკისტანს დაძაბულობის დეესკალაციის მიზნით თანამშრომლობისკენ მოუწოდა, - ამის შესახებ ინფორმაციას სააგენტო Reuters-ი აშშ-ის სახელმწიფო დეპარტამენტზე დაყრდნობით ავრცელებს.

აშშ-ის სახელმწიფო დეპარტამენტის ცნობით, სახელმწიფო მდივანი, მარკო რუბიო ინდოეთის საგარეო საქმეთა მინისტრ სუბრაჰმანიამ ჯაიშანკარს და პაკისტანის პრემიერ-მინისტრ შეჰბაზ შარიფს ესაუბრა.

„სახელმწიფო მდივანმა ინდოეთის საგარეო საქმეთა მინისტრთან სატელეფონო საუბარში პაჰალგამში მომხდარი საშინელი ტერორისტული თავდასხმის შედეგად დაღუპულთა გამო მწუხარება გამოხატა და ტერორიზმის წინააღმდეგ ბრძოლაში აშშ-ს მიერ ინდოეთის მიმართ მხარდაჭერა კიდევ ერთხელ დაადასტურა“, - ნათქვამია აშშ-ის სახელმწიფო დეპარტამენტის განცხადებაში.

მარკო რუბიომ პაკისტანის პრემიერ-მინისტრს, შეჰბაზ შარიფს ქაშმირში მომხდარი თავდასხმის გამოძიების პროცესში თანამშრომლობისკენ მოუწოდა.

„მარკო რუბიომ პაკისტანს ინდოეთთან დაძაბულობის დეესკალაციის, პირდაპირი კომუნიკაციის აღდგენისა და სამხრეთ აზიაში მშვიდობისა და უსაფრთხოების შესანარჩუნებლად თანამშრომლობისკენ მოუწოდა“, - აღნიშნულია აშშ-ის სახელმწიფო დეპარტამენტის განცხადებაში.