ინდოეთთან დაძაბული ურთიერთობის ფონზე, პაკისტანმა ყარაჩისა და ლაჰორის რეგიონებში საჰაერო სივრცე ერთი თვით დახურა.

ქვეყნის საავიაციო სამსახურში აცხადებენ, რომ გადაწყვეტილება უსაფრთხოების მიზნით მიიღეს. პაკისტანის ხელისუფლების თქმით, ფრენების განრიგი დიდწილად უცვლელი დარჩება და ნაწილობრივი შეზღუდვების მიუხედავად, ფრენები, სავარაუდოდ, ჩვეულ რიტმში შესრულდება.

იქამდე კი ცნობილი გახდა, რომ ინდოეთმა პაკისტანისთვის საჰაერო სივრცე მთლიანად დახურა. შეზღუდვები 23 მაისამდე იმოქმედებს. ამასთან, ოფიციალურმა დელიმ პაკისტანელებისთვის ვიზები გააუქმა და თავის მოქალაქეებს პაკისტანის დატოვებისკენ მოუწოდა.

22 აპრილს ინდოეთის ქაშმირში შეიარაღებულმა პირებმა პაჰალგანის მდელოზე ტურისტებს ცეცხლი გაუხსნეს, თავდასხმას 26 ადამიანი ემსხვერპლა, დაიჭრა 17. ინდოეთსა და პაკისტანს შორის კონფლიქტის მთავარი მიზეზი ქაშმირის რეგიონია, რომელზე პრეტენზიასაც ორივე მხარე აცხადებს.