ავსტრალიელმა ხალხმა ხმა ავსტრალიურ ღირებულებებს მისცა, - ამის შესახებ ავსტრალიის პრემიერ-მინისტრმა, ენტონი ალბანეზმა მმართველი „ლეიბორისტული პარტიის“ ქვეყნის ფედერალურ არჩევნებში გამარჯვების შემდეგ განაცხადა.

„ამ გლობალური გაურკვევლობის პერიოდში ავსტრალიელებმა ხმა ოპტიმიზმსა და სიმტკიცეს მისცეს. ავსტრალიელებმა მთავრობად „ლეიბორისტული პარტია“ აირჩიეს. ჩვენი მთავრობა კი ავსტრალიურ გზას აირჩევს, რადგან ჩვენ ვამაყობთ იმით, ვინც ვართ“, - განაცხადა ენტონი ალბანეზმა.

ალბანეზის განცხადებით, ავსტრალიის „პრემიერ-მინისტრის თანამდებობაზე მუშაობა მისი ცხოვრების უდიდესი პატივია“.

შეგახსენებთ, ავსტრალიის საყოველთაო არჩევნებში ქვეყნის მმართველმა მემარცხენე-ცენტრისტულმა „ლეიბორისტულმა პარტიამ“ გაიმარჯვა და ენტონი ალბანეზი ქვეყნის პრემიერ-მინისტრის თანამდებობას მეორე ვადით დაიკავებს. ავსტრალიის საარჩევნო კომისიის მონაცემებით, ამ დროისთვის „ლეიბორისტულ პარტიას“ 150 ადგილიან წარმომადგენელთა პალატაში 82 მანდატი აქვს მოპოვებული.

ოპოზიციური „ლიბერალურ-ნაციონალური კოალიციის“ ლიდერმა, პიტერ დატონმა არჩევნებში დამარცხება უკვე აღიარა და ალბანეზს გამარჯვება მიულოცა.