რუმინეთის პრემიერ-მინისტრის მოვალეობას ქვეყნის შინაგან საქმეთა მინისტრი შეასრულებს, - ამის შესახებ ინფორმაციას Associated Press-ი ავრცელებს.

Associated Press-ის ცნობით, რუმინეთის დროებითმა პრეზიდენტმა, ილიე ბოლოჟანმა მარჩელ ჩოლაკუს მიერ თანამდებობიდან გადადგომის შემდეგ, ქვეყნის დროებითი პრემიერ-მინისტრის თანამდებობაზე შინაგან საქმეთა მინისტრი, კატალინ პრედოიუ დანიშნა.

რუმინეთის მმართველ კოალიციაში შემავალი „ნაციონალური ლიბერალური პარტიის“ წევრი, კატალინ პრედოიუ პრემიერ-მინისტრის მოვალეობას ახალი მთავრობის ფორმირებამდე შეასრულებს.

შეგახსენებთ, გუშინ რუმინეთის „სოციალ-დემოკრატიული პარტიის“ ლიდერი, მარჩელ ჩოლაკუ პრემიერ-მინისტრის თანამდებობიდან გადადგა, მას შემდეგ რაც, 4 მაისს გამართულ საპრეზიდენტო არჩევნების პირველ ტურში მმართველი კოალიციის კანდიდატი დამარცხდა.

„ეს კოალიცია ლეგიტიმური არ არის, რადგან მისი კანდიდატი მეორე ტურში ვერ გადავიდა“, - განაცხადა მარჩელ ჩოლაკუმ.

რუმინეთში საპრეზიდენტო არჩევნების პირველ ტურში გამარჯვება ნაციონალისტმა კანდიდატმა, „რუმინელთა გაერთიანების ალიანსის“ (AUR) ლიდერმა, ჯორჯ სიმიონმა დაახლოებით 41%-ით მოიპოვა, მეორე ადგილზე კი ბუქარესტის მერი ნიკუშორ დანი გავიდა, ხოლო მმართველი კოალიციის კანდიდატმა, კრინ ანტონესკუმ მესამე ადგილი დაიკავა.

რუმინეთში საპრეზიდენტო არჩევნების მეორე ტური 18 მაისს გაიმართება.