პარტია „ალტერნატივა გერმანიისთვის“ ვადამდელი არჩევნების ჩატარებას ითხოვს, - ამის შესახებ ინფორმაციას The Guardian-ი ავრცელებს.

პარტია „ალტერნატივა გერმანიისთვის“ ლიდერის, ალის ვაიდელის განცხადებით, გერმანიის პარლამენტის მიერ კენჭისყრის პირველი ტურის შედეგად ფრიდრიხ მერცის კანცლერად არჩევის წარუმატებელი მცდელობა „გერმანიისთვის კარგ დღეს“ წარმოადგენს.

„თაღლითი და მატყუარა ფრიდრიხ მერცი არჩევნების პირველ ტურში დამარცხდა. ეს მომავალი მთავრობის არასტაბილურობის ნიშანია. ფრიდრიხ მერცის ნელი სიკვდილი უნდა დასრულდეს და გზა ახალი არჩევნებისთვის უნდა გაიხსნას“, - განაცხადა ალის ვაიდელმა.

შეგახსენებთ, დღეს, გერმანიის პარლამენტმა ხმის მიცემის პირველ ტურში ფრიდრიხ მერცი კანცლერად ვერ აირჩია. „ქრისტიან-დემოკრატიული კავშირის“ ლიდერის, ფრიდრიხ მერცის კანდიდატურას გერმანიის პარლამენტის ქვედა პალატაში მხარი 310-მა დეპუტატმა დაუჭირა, ხოლო მას ბუნდესტაგის წევრების უმრავლესობის, 316 დეპუტატის ხმა სჭირდებოდა. ახლა ბუნდესტაგს ქვეყნის კანცლერის არჩევა 14 დღის განმავლობაში შეუძლია.