ჩვენ გავაგრძელებთ სამოქალაქო საზოგადოებისა და საქართველოს დემოკრატიული განვითარების მხარდაჭერას. ჩვენ გავაგრძელებთ ქართველი ხალხისა და საქართველოს სამოქალაქო საზოგადოების მტკიცე მხარდაჭერას, - ამის შესახებ შვედეთის ელჩმა საქართველოში ანა ლიბერგმა „ინტერპრესნიუსს“ განუცხადა.

ელჩის თქმით, შვედეთი საქართველოს მხარს უჭერს, თუმცა ბოლო დროს ქვეყანაში განვითარებული ამბების გამო ოფიციალური სტოკჰოლმი შეშფოთებულია.

„შვედეთი საქართველოს დიდი ხნის პარტნიორია და როგორც დიდი ხნის პარტნიორი, ჩვენ შეშფოთებულები ვართ საქართველოში მიმდინარე მოვლენებით, რომლებიც, სამწუხაროდ, არ შეესაბამება კავშირის ღირებულებებსა და პრინციპებს“, - განაცხადა ელჩმა.

ელჩის თქმით, შვედეთის ევროპულ ბლოკში წევრობამ მეტი განვითარება და სტაბილურობა მოუტანა.

„ძალიან გვიხარია, რომ წელს ასევე აღვნიშნავთ ევროკავშირის წევრობის 30 წლისთავს. ევროკავშირის წევრობამ გააძლიერა შვედეთი, ჩვენი ეკონომიკა გაიზარდა. ჩვენ ბევრი რამ ვისწავლეთ ერთიანი ბაზრიდან და ადამიანების, საქონლისა და კაპიტალის თავისუფალი გადაადგილებიდან.

ამიტომ ჩვენთვის ეს ნათელი და პოზიტიური მოვლენაა. ასევე ვხედავთ, რომ ევროკავშირში საერთო გამოწვევები საერთო პასუხებს მოითხოვს. ერთად ჩვენ ნამდვილად ძლიერები ვართ, - განაცხადა ანა ლიბერგმა.

საქართველოს დიპლომატიური და სამსახურებრივი პასპორტების მფლობელებისთვის უვიზო რეჟიმის გაუქმების გადაწყვეტილებასთან დაკავშირებით, ელჩმა განაცხადა, რომ შვედეთი იზიარებს ბრიუსელის ოფიციალურ პოზიციას საქართველოსთან დაკავშირებით მიღებულ გადაწყვეტილებებზე და, ევროკავშირის სხვა ქვეყნების მსგავსად, შვედეთი გადაწყვეტილების განხორციელების პროცესში შიდა პროცედურებს იცავს.

„ჩვენ ამ პროცესის წინსვლისთვის შიდა პროცედურებს ვიცავთ. ამიტომ, კონკრეტული თარიღის დასახელება შეუძლებელია. ეს არის შიდა პროცედურები, რომლებიც უნდა დასრულდეს ამ გადაწყვეტილების სრულად განხორციელებამდე“, - განაცხადა ელჩმა.