იმ მომენტიდან, როდესაც ცვლილება შევიდა სისხლის სამართლის კოდექსში, პარლამენტის დროებითი საგამოძიებო კომისიის მოთხოვნის შეუსრულებლობა ისჯება სისხლის სამართლებრივი წესით, - ამის შესახებ „კოალიცია ცვლილებისთვის“ ლიდერის, ნიკა გვარამიას საქმის პროკურორმა მარი მეშველიანმა განაცხადა, რითაც პროცესზე ნიკა გვარამიასა და მისი ადვოკატების პოზიციას ეხმაურება იმის შესახებ, რომ პარლამენტის დროებითი საგამოძიებო კომისიის მოთხოვნის შეუსრულებლობა - ადმინისტრაციული სამართალდარღვევაა, ზუსტად იგივე მუხლი ადმინისტრაციულ სამართალდარღვევათა კოდექსშიც არსებობს [173,3] და სისხლის სამართლებრივი დევნა არ უნდა დაწყებულიყო.

პროკურორის განცხადებით, როდესაც გვაქვს ორი ნორმა და თანაბარი იურიდიული ძალის მქონე აქტები, უპირატესობა ენიჭება უფრო გვიან მიღებულ ნორმატიულ აქტს.

„თავდაპირველად ადმინისტრაციულ კანონმდებლობაში აღნიშნული ნორმა შეტანილი იქნა, როგორც ადმინისტრაციული სამართალდარღვევა, თუმცა შემდგომში, როდესაც ჩაითვალა, რომ ხსენებული ქმედებისთვის დაწესებული უნდა ყოფილიყო სისხლის სამართლის პასუხისმგებლობა. იმ მომენტიდან, როდესაც ცვლილება შევიდა სისხლის სამართლის კოდექსში, ეს ქმედება ისჯება სისხლის სამართლებრივი წესით.

როდესაც გვაქვს ორი ნორმა და თანაბარი იურიდიული ძალის მქონე აქტებია, უპირატესობა ენიჭება უფრო გვიან მიღებულ ნორმატიულ აქტს და ეს გაწერილია თავად ნორმატიული აქტების შესახებ საქართველოს კანონით. შესაბამისად აღნიშნული კანონით ვხელმძღვანელობთ“, - განაცხადა პროკურორმა.

ინფორმაციისთვის, ნიკა გვარამიას საქმე არსებითად განსახილველად სასამართლოს გადაეცა.

ნიკა გვარამიას ბრალი სისხლის სამართლის კოდექსის 349-ე მუხლით წარუდგინეს, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს, აღნიშნული ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

ნიკა გვარამიას აღკვეთის ღონისძიების სახით 30 000-ლარიანი გირაო აქვს შეფარდებული.

ნიკა გვარამიას გირაოს გადასახდელად 50-დღიანი ვადა განესაზღვრა, მას აღნიშნული ვადა 7 ივნისს ეწურება. აღნიშნულთან დაკავშირებით პოლიტიკოსის პოზიცია საჯაროდაა ცნობილი, ის გირაოს გადახდას არ აპირებს.