პოლიტიკური პარტია ყოველთვის უნდა ემზადებოდეს არჩევნებისთვის, რაც არ უნდა ხდებოდეს ქვეყანაში. ჩვენ ამას ვაკეთებთ, ვემზადებით , - ამის შესახებ „ძლიერი საქართველოს“ ერთ-ერთმა ლიდერმა, გიორგი სიორიძემ „პალიტრანიუსის“ გადაცემაში „360 გრადუსი“ განაცხადა.

გიორგი სიორიძის თქმით, „ლელო-ძლიერი საქართველო“ იმუშავებს ისე, როგორიც იქნება ამომრჩევლის დაკვეთა.

„ჩვენი პოზიცია თავიდანვე თანმიმდევრული და მკაფიო იყო. ჩვენ ვართ პოლიტიკური პარტია, რომელიც მინიმუმ 200 000 ამომრჩეველს წარმოადგენს, რაც ვერ გაგვიყალბეს, ეს დადასტურებული ფაქტია. ჩვენ ვემსახურებით ქართულ საზოგადოებას. პარტიას აქვს თავისი კონსტიტუციით განსაზღვრული ფუნქცია, ის უნდა მონაწილეობდეს პოლიტიკური ნების ფორმირებაში. სხვადასხვა ფორმა შეიძლება იყოს ამის. როდესაც ქვეყანაში მთავარი დღის წესრიგი იყო პროტესტი, „ლელო“ პირველი იდგა პროტესტში. ვერცერთი პარტია ვერ იტყვის, რომ „ლელოზე“ მეტი გაუკეთებია...

პოლიტიკური პარტია ყოველთვის უნდა ემზადებოდეს არჩევნებისთვის, რაც არ უნდა ხდებოდეს ქვეყანაში. ჩვენ ამას ვაკეთებთ, ვემზადებით, ვწვრთნით ჩვენს ხალხს იმიტომ, რომ მთავარი მიზანი რაც გვაქვს, ახალი საპარლამენტო არჩევნების მოპოვება, ბუნებრივია სინდისის პატიმრების გათავისუფლებასთან ერთად, ამისთვის უნდა ვიყოთ მზად და ეს საკითხი არ შეიძლება იყოს ჩამნაცვლებელი ამ მთავარი მოთხოვნისა.

ჩვენ ვამბობთ, რომ ეს ბრძოლა არ შეწყდება, არ შევწყვეტთ ჩვენც, მაგრამ რასაც ჩვენი ამომრჩეველი დაგვიკვეთავს იმ მომენტში, როდესაც იქნება სწორი გზა ბრძოლისა და გეგმის შემუშავებისა, ისე ვიმუშავებთ იმიტომ, რომ პასუხისმგებლობიანი, სოლიდური ოპოზიციური პარტია ვართ“, - განაცხადა გიორგი სიორიძემ.