აფხაზეთის უმაღლესი საბჭოს დეპუტატის, გია გვაზავას განცხადებით, რუსეთი თავის ქვეყანაში აფხაზეთის სრულ ინტეგრაციას ახდენს. აღნიშნული განცხადებით მან რუსეთის მიერ ოკუპირებული აფხაზეთისა და ცხინვალის რეგიონში მცხოვრებლებისთვის რუსეთის მოქალაქეობის მიღების გამარტივება შეაფასა.

გია გვაზავას თქმით, აფხაზების გადარჩენის ერთადერთი გზა საქართველოსთან ინტეგრირებაა.

„რუსეთი თავის ქვეყანაში აფხაზეთის, პრაქტიკულად, სრულ ინტეგრაციას ახდენს. ეს არის მთავარი მიზანი. ჩვენთან ალტრუისტები რომ არიან, როგორც პოლიტიკაში, ისე საზოგადოებაში, რომლებიც ლაპარაკობენ, თურმე, რუსეთი ჩვენ რაღაცას დაგვიბრუნებს, ახლა სხვა პერიოდია, რა დროს ევროპაა და ა.შ. მათ საყურადღებოდ: ცოტა დაფიქრდნენ რუსეთის ეს ნაბიჯი რაზე მეტყველებს – რუსეთი ამ რეგიონში თავის პოლიტიკას არასდროს შეიცვლის. ამას 300 წელი ამზადებდა. რატომ ახლა და რატომ მანამდე არა? როდესაც ქართულ საზოგადოებაში გაისმა ის, რომ, თურმე ურთიერთობაში რაღაცა უნდა მოხდეს, აფხაზეთსა და საქართველოს შორის რაღაც უნდა ჩამოყალიბდეს, ლაპარაკი იყო კონფედერაციულ მოწყობაზე, ქართულმა საზოგადოებამ ეს გაშიფრა და არ მიიღო,კონფედერაცია დამოუკიდებლობის აღიარებას ნიშნავს. ამის შემდგომ რუსეთმა თავის პოლიტიკა უფრო ღიად გააგრძელა, გვიჩვენა, ახლა ჩემს ქვეყანაში აფხაზეთის კიდევ უფრო მეტ ინტეგრაციას მოვახდენ და მერე თქვენ გადაწყვიტეთ, როგორც გინდათო.

დღეს აფხაზეთში პირველი კაცი, ანუ პრეზიდენტი აუცილებლად აფხაზი უნდა იყოს, ენა უნდა იცოდეს და ა.შ. დემოგრაფიული მდგომარეობა შეიცვალა სომხებისა და რუსების სასარგებლოდ. ამიტომ ხვალ, თუ ზეგ აფხაზებს ძალიან მარტივ კითხვას დაუსვამენ: თქვენ გინდათ განვითარება? ინვესტიციები? მაშინ უნდა იყოთ დემოკრატიულები, ამისთვის საჭიროა, დემოკრატიული კანონები იქნეს შემოღებული, უნდა იყოს თავისუფალი არჩევნები, პრეზიდენტი ხალხმა უნდა აირჩიოსო. რა შედეგით დამთავრდება ეს არჩევნები, ხომ ნათელია? დემოგრაფიის კუთხით იქ ძალიან რთული სურათია და უკვე აფხაზები მიხვდნენ, ვისაც გონება შედარებით ნათელი აქვს, თუ რა მოელის ეთნოსს. გადარჩენის ერთადერთი გზა საქართველოსთან ინტეგრირებაა. მათი გადარჩენის სხვა გზა არ არსებობს”- განაცხადა გვაზავამ „მედიაჰოლდინგ კვირაში“.