„თანაინვესტირების ფონდის“ ყოფილ ხელმძღვანელთან, გიორგი ბაჩიაშვილთან რუსთავის მე-12 პენიტენციურ დაწესებულებაში მისი ადვოკატები, ლევან მახარაშვილი და დავით ჯანდიერი იმყოფებიან.

როგორც ადვოკატები აცხადებენ, ბაჩიაშვილთან ეს შეხვედრა სამუშაო ხასიათის იქნება, შეეხება საქმის მასალებს და პოზიციებს შეაჯერებენ.

რაც შეეხება დაკავებულის მიერ გუშინ სასამართლო პროცესზე გაჟღერებულ ინფორმაციას, რომლის მიხედვითაც, „საერთაშორისო დანაშაული მოხდა, ის ბიძინა ივანიშვილის დავალებით მოიტაცეს, 2 დღე თვალებახვეული ჰყავდათ და კანონის დარღვევით ჩამოიყვანეს თვითმფრინავით საქართველოში", ამასთან დაკავშირებით ადვოკატები გამოძიების დაწყების მოთხოვნით შესაბამის უწყებას ორშაბათს, 2 ივნისს მიმართავენ. ამასთან, უფლებადამცველები იმედს გამოთქვამენ, რომ აღნიშნული მოთხოვნა უწყებებს სასამართლომაც გაუგზავნა.

ცნობისთვის, სახელმწიფო უსაფრთხოების სამსახურის ცნობით, 2025 წლის 26 მაისს განხორციელებული ანონიმური შეტყობინებით წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ წითელი ცირკულარით ძებნილი და მსჯავრდებული გიორგი ბაჩიაშვილი დააკავეს.

„თანაინვესტირების ფონდის“ ყოფილი გენერალური დირექტორი, „ქართული ოცნების“ დამფუძნებლის, ბიძინა ივანიშვილის კრიპტოვალუტის მითვისებაშია მსჯავრდებული და მას 11 წლით თავისუფლების აღკვეთა აქვს მისჯილი. ამასთან, მას ბრალი წარდგენილი აქვს ორ მიმდინარე საქმეზე.

ბაჩიაშვილს ბრალდება წარდგენილი აქვს საქართველოს სისხლის სამართლის კოდექსის 344-ე მუხლის პირველი ნაწილით, რაც სახელმწიფო საზღვრის უკანონოდ გადაკვეთას გულისხმობს და სასჯელის სახით ითვალისწინებს თავისუფლების აღკვეთას ვადით სამიდან ხუთ წლამდე.

ბაჩიაშვილს ბრალი აქვს წარდგენილი "მტკვარი ჰესის" საქმეზეც საქართველოს სსკ-ის 2201-ე მუხლის მე-2 ნაწილით, რაც სპეციალური უფლებამოსილების მქონე პირის მიერ სამსახურებრივი მოვალეობის შეუსრულებლობას ან არაჯეროვნად შესრულებას გულისხმობს, რამაც მძიმე შედეგი გამოიწვია. წარდგენილი ბრალდება სასჯელის სახედ და ზომად 2-დან 5- წლამდე თავისუფლების აღკვეთას ითვალისწინებს.