ჩრდილოეთ ირლანდიაში არეულობა გრძელდება, - ამის შესახებ ინფორმაციას სააგენტო Reuters-ი ავრცელებს.

სააგენტო Reuters-ის ცნობით, არეულობა, რომელიც არასრულწლოვან გოგონაზე სექსუალური ძალადობის ფაქტის წინააღმდეგ გამართულ საპროტესტო აქციას მოჰყვა, ჩრდილოეთ ირლანდიის სხვადასხვა ნაწილში მესამე ღამის განმავლობაში გაგრძელდა, თუმცა მოვლენების ეპიცენტრში, ქალაქ ბალიმენაში სიმშვიდე იყო.

ოთხშაბათს საღამოს პოლიციამ ბალიმენაში გზები გადაკეტა, ხოლო ახალგაზრდებმა პოლიციის ოფიცრებს ე.წ. ბენზინის ბომბები და ქვები ესროლეს.

შეგახსენებთ, ჩრდილოეთ ირლანდიის ქალაქ ბალიმენაში საპროტესტო აქციები მას შემდეგ დაიწყო, რაც ორშაბათს ორი 14 წლის რუმინელი მოზარდი ბიჭი, რომლებსაც არასრულწლოვან გოგონაზე სექსუალურ ძალადობაში ადანაშაულებენ, სასამართლოს წინაშე წარსდგა. ადვოკატმა მოსამართლეს განუცხადა, რომ ისინი ბრალდებებს უარყოფენ.

არეულობის შედეგად საცხოვრებელი სახლები, კერძო ბიზნესები და ავტომობილები დაზიანდა. პოლიციის თქმით, გამოძიება რასობრივად მოტივირებული სიძულვილით ჩადენილ თავდასხმებზე მიმდინარეობს.

დემონსტრანტებთან შეტაკებების შედეგად 17 პოლიციელი დაშავდა, ხოლო პოლიციამ 5 ადამიანი დააკავა.