თბილისის საქალაქო სასამართლოში ნარკოდანაშაულის ბრალდებით დაკავებული ჟურნალისტის, ნიკუშა კაციას სასამართლო სხდომა მიმდინარეობს.

დღევანდელ სასამართლო პროცესზე მტკიცებულებებს გამოიკვლევენ, კერძოდ, პროცესზე ბრალდების მხარის მიერ მოწვეულ გამომძიებელსა და ექსპერტს გამოკითხავენ.

პროცესის დაწყებისას ნიკუშა კაციამ დამსწრე პირებს წესრიგის დაცვისკენ მოუწოდა.

„გვემუქრებიან, რომ დარბაზს დაცლიან. ეს „ოცნების“ რექვიემია. შეიძლება ბოლო პროცესი იყოს, რომელსაც მედია აშუქებს, იმიტომ რომ რეჟიმი აპირებს აკრძალოს მედია გადაღება. ფაქტია, მბრძანებლის ცრუპენტელებს ეშინიათ სიმართლის. ცოტა დააგვიანდათ, რადგან სიმართლე უკვე მთელმა მსოფლიომ იცის, მაგრამ არა უშავს, როდესაც თქვენ სამართლიანად გაგასამართლებენ, ჩვენ მოვითხოვთ, რომ ისევ დაუშვან მედია პროცესებზე და გადაიღონ“, - განაცხადა ნიკუშა კაციამ.

ცნობისთვის, ნიკუშა კაციას ბრალი სისხლის სამართლის კოდექსის 260-ე მუხლის მე-6 ნაწილით წარედგინა, რაც დიდი ოდენობით ნარკოტიკული საშუალებების უკანანო შეძენა-შენახვას გულისხმობს.

აღნიშნული დანაშაული 8-დან 20-წლამდე ან უვადო თავისუფლების აღკვეთას ითვალისწინებს. ნიკუშა კაცია 7 დეკემბერს დააკავეს.