პატარძალმა ეზო ვერ დაგავა იმიტომ, რომ მრუდეაო - მამუკა ხაზარაძემ პოლიტიკაში წარმატებას ვერ მიაღწია და ამიტომ იჭერენო, იციან, რომ დაიჭერენ და თეატრალურ სპექტაკლს დგამენ, ოფისში ელოდებიან და ა.შ. არავინ არავის იჭერს განსხვავებული პოზიციის გამო, - ამის შესახებ „ხალხის ძალის” დეპუტატმა, გურამ მაჭარაშვილმა განაცხადა, რითაც უპასუხა შეკითხვას, რომელიც რიგი ოპოზიციონერი პოლიტიკოსების დაკავებაზე საერთაშორისო გამოხმაურებებს შეეხებოდა.

მისი თქმით, დაკავებულ პოლიტიკოსებს „არავინ ექომაგება, რადგან იციან, რომ როცა დანაშაულს სჩადიხარ, აუცილებლად დაგიჭერენ“.

„პატარძალმა ეზო ვერ დაგავა იმიტომ, რომ მრუდეაო“ - მამუკა ხაზარაძემ პოლიტიკაში წარმატებას ვერ მიაღწია და ამიტომ იჭერენო. რომელი პოლიტიკოსია, ვისაც ვინმემ განსხვავებული მოსაზრება შეუზღუდა, ან არჩევნებში მონაწილეობა? როცა "სისხლის სამართლის კოდექსს" არღვევ, ბუნებრივად მოხდება ის, რომ რეაგირება იქნება. ამერიკის პრეზიდენტისა და გენერალური პროკურორის განცხადებები მოისმინეთ, სადაც თქვეს, რომ ვინც კანონს შეეწინააღმდეგება, უმკაცრესი ზომები იქნება მიღებული - პირდაპირ დახვრეტაზე მიუთითებდა შერიფი. თან იციან, რომ დაიჭერენ და თეატრალურ სპექტაკლს დგამენ, ოფისში ელოდებიან და ა.შ. არავინ არავის იჭერს განსხვავებული პოზიციის გამო. მწვავე კრიტიკა სად ნახეთ? - მათი პატრონების პოზიციები გასაგებია. ისინი იმასაც ამბობენ, რომ სჯობს, საქართველოში მეორე ფრონტი გაიხსნასო. მათ არავინ ექომაგება, რადგან იციან, რომ როცა დანაშაულს სჩადიხარ, აუცილებლად დაგიჭერენ”, - აღნიშნა მაჭარაშვილმა.

ცნობისთვის, 24 ივნისს, „სტრატეგია აღმაშენებლის“ ლიდერი, გიორგი ვაშაძე სასამართლომ პარლამენტის დროებით საგამოძიებო კომისიის მოთხოვნის შეუსრულებლობის ფაქტზე დამნაშავედ ცნო. მოსამართლე ნინო გალუსტაშვილის გადაწყვეტილებით, მას 7 თვით თავისუფლების აღკვეთა მიესაჯა. ამასთან, აეკრძალა თანამდებობის დაკავება 2 წლის ვადით. ვაშაძე პარტიის ოფისში დააკავეს. ამავე ბრალდებით, 23 ივნისს დააკავეს "ძლიერი საქართველოს" ორი ლიდერი - მამუკა ხაზარაძე და ბადრი ჯაფარიძე. მათ სასამართლომ 8-8 თვიანი პატიმრობა შეუფარდა და აუკრძალა თანამდებობის დაკავება 2 წლის ვადით. ასევე, 23 ივნისს, სასამართლომ 8-თვიანი პატიმრობა მიუსაჯა "კოალიცია ცვლილებისთვის" ერთ-ერთ ლიდერს ზურაბ გირჩი ჯაფარიძეს, მასაც აეკრძალა 2 წლის ვადით თანამდებობის დაკავება.