იურიდიული დახმარების სამსახურის ადვოკატები, რომლებიც ჯგუფური ძალადობის მონაწილეობის ბრალდებით დაკავებულებს სასამართლომ სავალდებულო წესით დაუნიშნა, საქმიდან ჩამოცილებას ითხოვენ.

როგორც ადვოკატმა ირაკლი ბენიამ განაცხადა, მან გუშინ მის დასაცავ 4 პირთან - რევაზ კიკნაძესთან, ვალერი თეთრაშვილთან, ონისე ცხადაძესთან და რუსლან სივაკოვთან პენიტენციურ დაწესებულებაში ვიზიტი დაჯავშნა, თუმცა, ბრალდებულებმა უნდობლობა გამოუცხადეს და მას არ შეხვდნენ.

ადვოკატი საქმიდან ჩამოცილებას ითხოვს. მას მოსამართლე ნინო გალუსტაშვილმა იმ განმარტების წაკითხვის საშუალება არ მისცა, რითაც ადვოკატს სურდა განემარტა, თუ რა დროს ინიშნება საზოგადოებრივი ადვოკატი.

„რევაზ კიკნაძესთან და ონისე ცხადაძესთან ჩემი კომუნიკაციაც არ შედგა, საკნიდან არ ამოვიდნენ, რაც შეეხება ვალერი თეთრაშვილს და რუსლან სივაკოვს, ისინი ამოვიდნენ, მაგრამ როცა გაიგეს, რომ მე ახლადდანიშნული ადვოკატი ვიყავი, შეხვედრის ადგილი დატოვეს. ჩემი კომუნიკაცია ორ ადამიანთან არ შედგა...

დაკავებულებს ვეთანხმები, მინიმუმ ბრალდებულებთან კომუნიკაციაც არ შედგა, ორი მათგანი საერთოდ ნდობასაც არ მიცხადებს, შეხვედრის ოთახშიც არ ამოვიდა, ფიზიკურადაც არ ამოვიდნენ. აქ ნათელია ყველაფერი, რა თქმა უნდა, ვეთანხმები ბრალდებულებს და ვითხოვ ჩამოცილებას",- განაცხადა ბენიამ.