ჯგუფურ ძალადობაში მონაწილეობის ბრალდებით დაკავებული რევაზ კიკნაძე მოსამართლე ნინო გალუსტაშვილმა სხდომათა დარბაზიდან გააძევა.

გალუსტაშვილმა კიკნაძეს ასე მიმართა, "გაძევებული ხართ მოსამართლის დაუმორჩილებლობის გამო".

კიკნაძე პოზიციას დაკავებულების მიმართ აღკვეთის ღონისძიების შეფარდების საკითხთან დაკავშირებით აფიქსირებდა, რა დროსაც მას მოსამართლემ საქმის გარშემო საუბრისკენ მოუწოდა.

"ახალი დანაშაულიო, ძველი რა არის? ვინ დავაზიანე, რა დავაზიანე? ამდენი ვაი მოწმე რომ გვყავდა, ეს არავის უთქვამს, ყველა მოწმე ამბობს, არ დამინახავსო, არ ვიციო. ძველი დანაშაული არ არსებობს და ახალი როგორ უნდა ჩავიდინო?

ლუკა ჯაბუაზე მინდა ვთქვა, 21 წლისაა, ყველა მოსვლაზე ამბობს, რომ მომისჯიან, უნდა ვისწავლო ციხიდანო, რა მოხდება, რომ ადამიანმა გარედან ისწავლოს?...

მე უნდა ვიხვეწებოდე, რომ გარეთ გამიშვან? რა მინდა აქ საერთოდ?... ამბროსი ხელაია დაიჭირეს, რომელიც რუსებს ებრძოდა, მთელი ცხოვრება იმას შესწირა, რომ ქართული ეკლესია არ გარუსებულიყო",- განაცხადა კიკნაძემ.

მოსამართლემ მას მოუწოდა, საქმის გარშემო ესაუბრა.

"ლაპარაკის უფლება არ მაქვს? შემხებლობაში რომ არაა, საიდან იგებთ, შუაში მაწყვეტინებთ. ხან ამბროსი ხელაიაზე მაწყვეტინებენ, ხან ანწუხელიძეზე, არაპატრიოტები არიან, საქართველო რომ არ უყვართ…..წინაზე იმიტომ გამაძევეს, რომ ანწუხელიძე ვახსენე", - განაცხადა კიკნაძემ.