ისრაელის თავდაცვის მინისტრის, ისრაელ კაცის განცხადებით, ისრაელი ირანთან 12-დღიანი კონფლიქტის დროს ირანის უზენაესი ლიდერის, აიათოლა ალი ხამენეის ლიკვიდაციას ცდილობდა, თუმცა ამის შესაძლებლობა არ მიეცა, - ინფორმაციას The Times of Israel-ი ავრცელებს.

„ჩვენი თვალთახედვის არეალში რომ ყოფილიყო, ჩვენ მას გავანადგურებდით“, - განუცხადა კაცმა Channel 13-ს და დასძინა, რომ ისრაელი „ბევრს ეძებდა“ ხამენეის, მაგრამ ოპერატიული შესაძლებლობა არ გაჩენილა.

მისი თქმით, ისრაელმა აიათოლა ალი ხამენეის პოვნა ბუნკერში დამალვის შემდეგ ვერ შეძლო.

„ხამენეი ამას მიხვდა და ძალიან ღრმად ჩავიდა მიწის ქვეშ, გაწყვიტა კავშირი მეთაურებთან. ამიტომ, საბოლოოდ, ეს [მისი ლიკვიდაცია] არარეალური იყო“, - განუცხადა კაცმა კანს.

კითხვაზე, ითხოვა თუ არა ისრაელმა ამერიკის თანხმობა ასეთი ქმედებისთვის, ისრაელის თავდაცვის მინისტრმა უპასუხა: „ამ ყველაფრისთვის ნებართვა არ გვჭირდება“.