მოსამართლე ნინო გალუსტაშვილმა, ბრალდებულ ირაკლი ქერაშვილის შუამდგომლობა 1-ელი ივლისის პროცესის გადადებასთან დაკავშირებით დააკმაყოფილა.

ბრალდებულმა ირაკლი ქერაშვილმა, მოსამართლეს განუცხადა, რომ 1-ელ ივლისს ბრალდებული ონისე ცხადაძის მამის დაკრძალვაა და სოლიდარობის ნიშნად სხდომაზე გამოცხადებას არ აპირებენ, მაგრამ, რადგან სხდომებში მონაწილეობის მიღება სურთ, პროცესის გადადებას ითხოვენ.

"მოგეხსენებათ, 1 ივლისს ონისე ცხადაძის მამის დაკრძალვაა და სოლიდარობის ნიშნად, არ ვაპირებთ სხდომაზე გამოცხადებას. ვინაიდან, სხდომებში მონაწილეობა გვინდა, გთხოვთ, რომ გადადოთ ხვალინდელი პროცესი“, - განაცხადა სასამართლო სხდომაზე ირაკლი ქერაშვილმა.

აღნიშნულს პროკურორებიც დაეთანხმნენ და მოსამართლემ პროცესი 4 ივლისს გადადო.

დღევანდელ სასამართლო პროცესზე, მხარეებმა 4 მოწმე პოლიციელი გამოკითხეს და წერილობითი მასალები გამოიკვლიეს.

ცნობისთვის, პარლამენტთან მიმდინარე საპროტესტო აქციების დროს, ჯგუფურ ძალადობაში მონაწილეობის ბრალდებით დაკავებულ მსახიობ ანდრო ჭიჭინაძის, იუმორისტ ონისე ცხადაძისა და კიდევ 9 პირის საქმე ერთ წარმოებად გაერთიანდა.

დაკავებულებს - ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კიკნაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.

აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.