მოსამართლე ნინო გალუსტაშვილი პოლიციელზე თავდასხმისთვის ბრალდებული გიორგი მინდაძის საქმესთან დაკავშირებით სათათბიროდ გავიდა.

მანამდე მან დაცვის მხარის დასკვნითი სიტყვა მოისმინა, ასევე ბრალდებულის საბოლოო სიტყვაც.

გიორგი მინდაძემ დამსწრე პირებს მიმართა და უთხრა, რომ მისთვის განაჩენს მნიშვნელობა არ აქვს და საზოგადოებას მოუწოდა, რომ სხვა დაპატიმრებული პირები არ მიატოვონ.

„ხალხო, ჩემთვის თქვენი კარგად და უსაფრთხოდ ყოფნა მნიშვნელოვანია. ჩემთვის სასჯელს მნიშვნელობა არ აქვს, მადლობა, რომ ამ ცირკის სანახავად მოდიოდით. მიიღეთ განაჩენი მშვიდად და ნუ დატოვებთ ბიჭებს. ასევე ბიჭების 99% თვლის, რომ "ლელო-ძლიერმა საქართველომ" არჩევნებეი მონაწილეობა არ უნდა მიიღონ“, - განაცხადა გიორგი მინდაძემ.

ცნობისთვის, სამედიცინო უნივერსიტეტის სტუდენტს, გიორგი მინდაძეს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. კერძოდ, მას ედავებიან, რომ 29 ნოემბერს, პოლიციელს პიროტექნიკა ესროლა, რის შედეგადაც მან ფეხზე დაზიანება მიიღო.