საქართველოს ინფრასტრუქტურის სამინისტროს საავტომობილო გზების დეპარტამენტის ინფორმაციით, საერთაშორისო მნიშვნელობის თბილისი-სენაკი-ლესელიძის საავტომობილო გზის 26-ე კმ-ზე, მდინარე არაგვის ხიდზე (მარცხენა, თბილისის მიმართულება), ხიდის სავალ ნაწილიზე მიმდინარეობს დაზიანებული ფილის აღდგენის სამუშაოები.

მათივე ცნობით, აღდგენითი სამუშაოების ტექნოლოგიური პროცესიდან გამომდინარე, ბეტონის სრულად გამაგრებას გარკვეული დრო სჭირდება. აღნიშნული მიზეზით, სამუშაოების პერიოდში, 10 დღის განმავლობაში, დასავლეთიდან აღმოსავლეთის მიმართულებით მოძრაობა 23:00 საათიდან 07:00 საათამდე მხოლოდ ერთ ზოლზე განხორციელდება, ხოლო დანარჩენ დროს ტრანსპორტის გადაადგილება ორ ზოლში გაგრძელდება.

„მნიშვნელოვანია აღინიშნოს, რომ არსებული ხიდის პარალელურად მიმდინარეობს ახალი ხიდის მშენებლობა, რომლის ექსპლუატაციაში გაშვება მომავალი წლისთვის არის დაგეგმილი.

არსებული ხიდი 1973 წელს აშენდა და მის სავალ ნაწილზე პერიოდულად გამოვლენილი დაზიანებების აღდგენითი სამუშაოები მოძრაობის შეზღუდვის მიზეზი ხდება.

საავტომობილო გზების დეპარტამენტი ბოდიშს გიხდით შექმნილი დროებითი დისკომფორტისთვის”, - ნათქვამია ინფორმაციაში.