თბილისის საქალაქო სასამართლოში, ჯგუფურ ძალადობაში მონაწილეობის ბრალდებით დაკავებული მსახიობის, ანდრო ჭიჭინაძის, ონისე ცხადაძისა და კიდევ 9 პირის სასამართლო პროცესი მიმდინარეობს.

დღევანდელ სხდომაზე ბრალდების მხარის მტკიცებულებებს გამოიკვლევენ. კერძოდ კი, სასამართლოში ბრალდების მხარის ორი მოწმე უნდა დაეკითხათ, თუმცა ერთი მათგანი დაცვის მხარემ უდავო გახადა, შესაბამისად, ახლა სასამართლოში პოლიციის თანამშრომელს, ალექსანდრე გაფრინდაშვილს უსმენენ.

სხდომას ესწრებიან ბრალდებულები, გარდა რევაზ კიკნაძისა, ის პროცესიდან გაძევებულია.

პროცესის დაწყებისას, მაშინ, როცა დაკავებულები დარბაზში შემოიყვანეს, დამსწრეებმა, ლუკა ჯაბუას დაბადების დღე მიულოცეს. ის დღეს, 21 წლის გახდა. სხდომათა დარბაზი, რომელიც 150 დამსწრეს იტევს, სავსეა.

ცნობისთვის, პარლამენტთან მიმდინარე საპროტესტო აქციების დროს, ჯგუფურ ძალადობაში მონაწილეობის ბრალდებით 11 პირი დააკავეს.

დაკავებულებს - ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კინაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.

აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.