ეროვნული ანტიკორუფციული ბიუროსა და სპეციალური ანტიკორუფციული პროკურატურის შესახებ მიღებული კანონის წინააღმდეგ საპროტესტო აქციები უკრაინის ქალაქებში სამი დღეა გრძელდება, - ინფორმაციას უკრაინული მედია ავრცელებს.

საპროტესტო აქციები 22 ივლისს დაიწყო. დემონტრანტების ერთ-ერთი მოთხოვნაა, ვეტო დაედოს ანტიკორუფციული ორგანოების - ეროვნული ანტიკორუფციული ბიუროსა და სპეციალური ანტიკორუფციული პროკურატურის - უფლებამოსილებების შემცირების შესახებ კანონს.

საპროტესტო აქციები გაიმართა კიევში, როვნოში, ლვოვში, ტერნოპილში, დნეპრში, ზაპოროჟიესა და სხვა ქალაქებში.

შეგახსენებთ, 21 ივლისს, უკრაინის უსაფრთხოების სამსახურმა და გენერალური პროკურატურის ოფისმა ქვეყნის სხვადასხვა რეგიონში ეროვნული ანტიკორუფციული ბიუროს 19 თანამშრომლის ჩხრეკა ჩაატარა.

მეორე დღეს, უმაღლესმა რადამ მიიღო კანონი სისხლის სამართლის საპროცესო კოდექსში შეტანილი ცვლილებებით, რომლის მიხედვითაც ანტიკორუფციული ბიურო და სპეციალური ანტიკორუფციული პროკურატურა დამოკიდებული ხდებიან გენერალური პროკურორის გადაწყვეტილებებზე. 22 ივლისის საღამოს ზელენსკიმ დოკუმენტს ხელი მოაწერა.

ამ საკანონმდებლო ინიციატივის მიღების შემდეგ უკრაინის ბევრ ქალაქში საპროტესტო აქციები გაიმართა.