ბათუმის საქალაქო სასამართლოში „ქართული ოცნების“ ყოფილი დეპუტატის, ვეტერანი მოჭიდავის, ლუკა კურტანიძისთვის აღკვეთის ღონისძიების შეფარდების თაობაზე სასამართლო პროცესი დღეს გაიმართება.

სხდომა 17:30 საათზეა ჩანიშნული. საქმეს მოსამართლე ვიქტორ მეტრეველი განიხილავს.

პროკურატურა კურტანიძისთვის ყველაზე მკაცრი აღკვეთის ღონისძიების, პატიმრობის გამოყენებას მოითხოვს. რაც შეეხება დაცვის მხარეს, როგორც ადვოკატი აცხადებს, ის კურტანიძის აღკვეთის ღონიძიების გარეშე დატოვებას მოითხოვს, სასამართლოს კი, ალტერნატივის სახით გირაოს შესთავაზებს.

ლუკა კურტანიძეს ბრალდება ოჯახის წევრის მიმართ ძალადობის, ოჯახის წევრის ნივთის განზრახ დაზიანებისა და ოჯახის წევრის მიმართ დამცავი ორდერით გათვალისწინებული მოთხოვნების და ვალდებულებების შეუსრულებლობის მუხლით წარედგინა.

აღნიშნული ქმედება 5 წლამდე ვადით თავისუფლების აღკვეთას ითვალისწინებს.