ასეთი ტიპის სიახლოვე არღვევს ხაზს ერთი მხრივ, კანონის დაცვასა და მეორე მხრივ, პოლიტიკურ კორუფციას შორის, ერთი მხრივ დიპლომატიურ ნეიტრალიტეტსა და მეორე მხრივ, საშინაო საქმეებში ჩარევას შორის,- ასე ეხმიანება პარლამენტის ევროპასთან ინტეგრაციის კომიტეტის თავმჯდომარე ლევან მახაშვილი “კურიერის“ მიერ გავრცელებულ ინფორმაციას, რომლის თანახმად, “ლელო - ძლიერი საქართველოს“ ლიდერის მამუკა ხაზარაძის ცოლს სახლი მიქირავებული აქვს გერმანიის ელჩ პეტერ ფიშერისთვის, რომლის დამადასტურებელი ქირავნობის ხელშეკრულებაც არ მოიპოვება.

მახაშვილის თქმით, პეტერ ფიშერისგან მსგავსი საქციელი მოულოდნელი და გასაკვირი არ არის.

“ზოგადად, სასურველი არ არის, როცა ასეთი ტიპის ურთიერთობებთან გვაქვს საქმე. ყოველთვის არის რისკი, რომ დიპლომატიური ნეიტრალიტეტი ისეთ საქმიანობაში გადაიზარდოს, რომ ვიღაცას დიპლომატის პოლიტიკურ პროცესში ჩართვასთან დაკავშირებით კითხვები გაუჩნდეს, მით უფრო მაშინ, როცა ჩვენ ხელშეკრულება არა გაქვს. ასეთი ტიპის სიახლოვე, რა თქმა უნდა, ბუნდოვანებას აჩენს და არღვევს ხაზს ერთი მხრივ, კანონის დაცვასა და მეორე მხრივ პოლიტიკურ კორუფციას შორის, დიპლომატიურ ნეიტრალიტეტსა და საშინაო საქმეებში ჩარევას შორის.

სწორედ ამიტომ მოვუწოდებდით ამა თუ იმ დიპლომატს, რომ მაქსიმალურად თავი შეეკავებინათ მსგავსი ტიპის სიახლოვისგან და ჩარევებისგან ქართულ პოლიტიკაში, თუმცა ჩვენ არ გვიკვირს პეტერ ფიშერისგან, ისეთები ვნახეთ კონკრეტულად მისგან, რომ გასაგებია, ეს შეიძლება მისთვის კანონის დარღვევა სულაც არ იყოს პრობლემა, მისთვის არ იყოს პრობლემა ვენის კონვენციის დარღვევა, არ იყოს პრობლემა დიპლომატიური ეთიკის დარღვევა. სამწუხაროდ, ზოგიერთ ასეთ დიპლომატთან გვაქვს დღეს ჩვენ საქმე“,- განაცხადა ლევან მახაშვილმა.