ნინო დათაშვილი არის უდანაშაულო, ის არანაირ საფრთხეს არ წარმოადგენს საზოგადოებისთვის და არც სისტემისთვის, გარდა იმ სამოქალაქო პოზიციისა, რომელიც მას აქვს,- ეს განცხადება, ბათუმში „კოალიცია ცვლილებისთვის” წევრებმა პარტიის ოფისში ბრიფინგზე განაცხადეს.

ისინი დაკავებულ სამოქალაქო აქტივისტს ნინო დათაშვილს მხარდაჭერას უცხადებენ და საზოგადოებას მოუწოდებენ, რომ აღნიშნულ საქმეზე საზოგადოებას მკაცრი რეაქცია უნდა ჰქონდეს.

„რეჟიმმა გადაწყვიტა სამოქალაქო აქტივისტი ნინო დათაშვილის წინააღმდეგ გამოიყენოს ისეთი რეპრესიები, რასაც საბჭოთა ბოლშევიკური რეჟიმი იყენებდა. დღეს ჩვენ ვხედავთ, ნინო დათაშვილთან დაკავშირებით გაუგონარ არაადამიანურ ფაქტებს. მისი ფსიქიატრიულში გადაყვანას იძულებით გულისხმობს. ნინო დათაშვილი ფსიქიატრიულში კი არა სასჯელაღსრულების დაწესებულებაშიც არ უნდა იყოს, ამ საქმესთან დაკავშირებით უდანაშაულოა, ჩვენ მთელ მსოფლიოს გავაგებინებთ, თუ როგორ ექცევა ბიძინა ივანიშვილი იმ ადამიანებს, ვინც მას არ ეთანხმება. ნინო დათაშვილი არის უდანაშაულო, ის არანაირ საფრთხეს არ წარმოადგენს საზოგადოებისთვის და არც სისტემისთვის, გარდა იმ სამოქალაქო პოზიციისა, რომელიც მას გააჩნია. ნინო დათაშვილი არ უნდა იმყოფებოდეს, სასჯელაღსრულების დაწესებულებაში, ამ საქმესთან დაკავშირებით ყურადღება იქნება ძალიან მკაცრი, და ყველა სამართლებრივ და არასამართლებრივ გზას გამოვიყენებთ, რომ ყველა პოლიტპატიმარი დავიხსნათ“, - აცხადებს თენგო თევზაძე.

„კოალიცია ცვლილებისთვის“ კიდევ ერთი წევრის, გიორგი კირთაძის განცხადებით, მისი პარტია ყველაფერს გააკეთებს, „ნინო დათაშვილის და სხვა სინდისის პატიმრების დახსნისთვის“.

„ნაზი შამანაურის ქვეყანაში არ შეიძლება, ნინო დათაშვილის საქმეზე არ გქონდეს ძალიან მკვეთრი და მკაფიო რეაქცია. მიუხედავად იმისა, რომ ჩვენი პოლიტიკური საბჭოს წევრები და თავმჯდომარეები ციხეში არიან, პარტიის სხვა წევრები იდევნებიან, ჩვენი პარტია ყველაფერს გააკეთებს, ყველა მის ხელთ არსებულ რესურსით იქნება ჩართული ნინო დათაშვილის და სხვა სინდისის პატიმრების დახსნის ამბავში. მოვუწოდებ ადამიანებს, რომლებიც ჯერ კიდევ ვერ აცნობიერებენ, რა ეტაპზე მიგვიყვანა რეჟიმმა, წავიკითხოთ საქართველოს ისტორია, არც ისე დიდი ხნის წინანდელი ისტორია და გავაკეთოთ სწორი პარალელი. ყველას ერთად ხმის ამოღების დროა”,- აცხადებს გიორგი კირთაძე.