თამამად ვიტყვი, ამ დონის სამართლებრივი ხასიათის დოკუმენტი, რომელსაც ქართულ პოლიტიკაში პრაქტიკული შედეგები მოჰყვა, არა თუ საქართველოს უახლოეს ისტორიაში, ზოგადად არ არსებობს - ეს დოკუმენტი გახდება სახელმძღვანელო, რომლითაც თაობები გაიგებენ თუ როგორი არ უნდა იყოს პოლიტიკური ძალა არა თუ ხელისუფლებაში, არამედ პოლიტიკაში! - ამის შესახებ პარლამენტის დროებითი საგამოძიებო კომისიის ბოლო სხდომაზე, „ხალხის ძალის“ დეპუტატმა გურამ მაჭარაშვილმა განაცხადა, რომელიც კომისიაში ოპოზიციონერი წევრის სტატუსით საქმიანობდა.

მაჭარაშვილის თქმით, დარწმუნებულია, პარლამენტის საგამოძიებო კომისია და კომისიის მიერ მომზადებული დასკვნა ისტორიული იქნება.

“ნიურნბერგის პროცესის დროს ინტერნეტი და ინფორმაციის გაცვლის ასეთი საშუალებები არ იყო. თაობებმა წლების შემდეგ გაიგო და შემდგომ გახდა საფუძველი ჯერ გერმანიაში და შემდეგ მთელს მსოფლიოში თუ როგორი არ უნდა იყოს პოლიტიკური ძალა.

ვინც ამ სამართლებრივ დასკვნას წაიკითხავს, მიხვდება, თუ რატომ გახდება საგამოძიებო კომისიის დასკვნა ისტორიულიც და სამართლებრივი სახელმძღვანელო მომავალი თაობებისთვის“, - განაცხადა გურამ მაჭარაშვილმა.

პარლამენტის დროებითი საგამოძიებო კომისია საკუთარ დასკვნას, რომელიც დღევანდელ დასკვნით სხდომაზე დაამტკიცა, საშემოდგომო სესიის დაწყებისას პარლამენტის პლენარულ სხდომაზე წარადგენს.

XI მოწვევის პარლამენტში დროებითი საგამოძიებო კომისია თებერვლის თვეში შეიქმნა და უფლებამოსილების ვადა სამჯერ გაუგრძელდა.

კომისია თავდაპირველად "ნაციონალური მოძრაობის" ხელისუფლებაში ყოფნის პერიოდის შესწავლის მანდატით ჩამოყალიბდა, თუმცა მანდატი

მალევე გაუფართოვდა და მისი ინტერესის საგანი ყოფილი თანამდებობის პირების 2003 წლიდან დღემდე საქმიანობის შესწავლა გახდა.

დროებით საგამოძიებო კომისიის თავმჯდომარეობა პარლამენტის ვიცე-სპიკერს თეა წულუკიანის ჩაბარდა. კომისიაში ოპოზიციის სტატუსით წარმოდგენილი არიან დეპუტატები: - სოზარ სუბარი, გურამ მაჭარაშვილი და ილია ინჯია, ხოლო ფრაქცია "ქართული ოცნებიდან" - თენგიზ შარმანაშვილი, ალექსანდრე ტაბატაძე, ირაკლი ქადაგიშვილი და ალუდა ღუდუშაური.

აღნიშნულ კომისიაში გამოუცხადებლობის გამო რამდენიმე ოპოზიციონერი ლიდერი საპატიმრო დაწესებულებაში სასჯელს იხდის.