ისრაელის პრემიერ-მინისტრის ბენიამინ ნეთანიაჰუს განცხადებით, ავსტრალიის პრემიერ-მინისტრის პოლიტიკური რეპუტაცია სამუდამოდ შეილახა.

ბენიამინ ნეთანიაჰუმ მისი ავსტრალიელი კოლეგის, ენტონი ალბანეზეს შესახებ კიდევ ერთი განცხადება გააკეთა, მას შემდეგ რაც რამდენიმე დღის წინ მას „სუსტი პოლიტიკოსი“ უწოდა.

„ვფიქრობ, მისი რეპუტაცია სამუდამოდ შეილახა იმ სისუსტით, რომელიც მან „ჰამასის“ ტერორისტი მონსტრების წინაშე გამოიჩინა“, - განაცხადა ნეთანიაჰუმ Sky News Australia-თან ინტერვიუში.

ცნობისთვის, რამდენიმე კვირის წინ ავსტრალიის პრემიერ-მინისტრმა, ენტონი ალბანეზემ განაცხადა, რომ სექტემბერში პალესტინის სახელმწიფოს აღიარებას გეგმავს. ავსტრალიის მინისტრმა მიგრაციის საკითხებში, ტონი ბურკმა აღნიშნა, რომ ნეთანიაჰუს კრიტიკა სწორედ ამ გადაწყვეტილებამ გამოიწვია.

ავსტრალიის პრემიერმა ნეთანიაჰუს კრიტიკაზე საპასუხოდ განაცხადა, რომ „ამას პირადად არ იღებს“.

„მე სხვა ქვეყნების ლიდერებს პატივისცემით ვეპყრობი, მათთან დიპლომატიური გზით ვთანამშრომლობ“, - აღნიშნა ენტონი ალბანეზემ.