საფრანგეთის პრეზიდენტმა ემანუელ მაკრონმა ისრაელის პრემიერ-მინისტრ ბენიამინ ნეთანიაჰუს განცხადებებს „სამარცხვინო“ და „არასწორი“ უწოდა მას შემდეგ, რაც ისრაელის პრემიერ-მინისტრმა აღნიშნა, რომ მაკრონის განზრახვა პალესტინის სახელმწიფოს აღიარების შესახებ ანტისემიტიზმს აღვივებს.

ნეთანიაჰუმ საფრანგეთის პრეზიდენტი ანტისემიტიზმის წაქეზებაში დაადანაშაულა და აღნიშნა, რომ პალესტინის აღიარება მხოლოდ უფრო გაამწვავებს კონფლიქტს.

„[ნეთანიაჰუს] ანალიზი, რომლის მიხედვითაც საფრანგეთის მიერ სექტემბერში პალესტინის სახელმწიფოს აღიარების შესახებ გადაწყვეტილება საფრანგეთში ანტისემიტურ ძალადობას გაზრდის, არასწორია, სამარცხვინოა და უპასუხოდ არ დარჩება“, - უპასუხა მაკრონმა.

ივლისში საფრანგეთის პრეზიდენტმა განაცხადა, რომ სექტემბერში დაგეგმილ გაეროს მომდევნო გენერალურ ასამბლეაზე საფრანგეთი პალესტინის სახელმწიფოს აღიარებს. ემანუელ მაკრონის გეგმამ ისრაელისა და შეერთებული შტატებისაგან დიდი კრიტიკა დაიმსახურა.