ფსიქიკური ჯანმრთელობისა და ნარკომანიის პრევენციის ცენტრის აღმასრულებელმა დირექტორმა, ლევან ჩაკვეტაძემ თანამდებობა დატოვა.

როგორც ლევან ჩაკვეტაძე აღნიშნავს, თანამდებობას პირადი გადაწყვეტილების საფუძველზე ტოვებს.

„პირადი მიზეზებით მივიღე გადაწყვეტილება დავტოვო აღმასრულებელი დირექტორის პოზიცია. მინდა დიდი მადლობა გადავუხადო ჩემს გუნდს, რომელმაც მნიშვნელოვანი წვლილი შეიტანა ქვეყანაში მიმდინარე უმნიშვნელოვანესი რეფორმის განხორციელებაში. გულწრფელ მადლობას ვუხდი მინისტრს, ბატონ მიხეილ სარჯველაძეს, ჩემდამი გამოცხადებული ნდობისთვის და იმ შესაძლებლობებისთვის, რაც მომეცა ამ მეტად საპასუხისმგებლო პროცესში მონაწილეობის მისაღებად.

გუნდსა და სამინისტროს ვუსურვებ წარმატებას რეფორმის გაგრძელებაში, რათა ერთობლივი ძალისხმევით ქვეყანამ მიაღწიოს მთავარ მიზანს – ნარკოდამოკიდებულ პირებს მიეწოდოს ხარისხიანი, რეალურ შედეგზე ორიენტირებული სერვისები,“ – აღნიშნა ლევან ჩაკვეტაძემ, რომლის კომენტარსაც ფსიქიკური ჯანმრთელობისა და ნარკომანიის პრევენციის ცენტრი ავრცელებს.

შეგახსენებთ, 15 აგვისტოდან ოპიოიდური დამოკიდებულების ჩანაცვლებითი მკურნალობის პროგრამა სრულად სახელმწიფოს მართვაში გადავიდა. გაუქმდა ჩანაცვლებითი თერაპიის კერძო ცენტრები, სერვისს ყველა ბენეფიციარს, სახელმწიფო აწვდის.