უნგრეთის ელჩი უკრაინის საგარეო საქმეთა სამინისტროში დაიბარეს, - ამის შესახებ უკრაინის საგარეო საქმეთა მინისტრი, ანდრეი სიბიგა სოციალურ პლატფორმა X-ზე გამოქვეყნებულ პოსტში წერს.

„მას საპროტესტო ნოტა გადაეცა უნგრეთის მიერ უკრაინაში მცხოვრები უნგრული უმცირესობის, განსაკუთრებით კი უნგრული წარმოშობის ჩვენი დამცველის დისკრიმინაციის საპასუხოდ, რომელსაც წინაპრების ქვეყანაში შესვლა აეკრძალა“, - წერს სიბიგა.

მისი განცხადებით, უკრაინა უნგრეთს მოუწოდებს, თავი შეიკავოს არამეგობრული ქმედებებისგან და კონსტრუქციულ დიალოგში ჩაერთოს.

„მოვუწოდებთ უნგრეთს, თავი შეიკავოს არამეგობრული ქმედებებისგან და ამის ნაცვლად კონსტრუქციულ დიალოგში ჩაერთოს, რისთვისაც უკრაინა მზადაა“, - წერს სიბიგა.

უკრაინის საგარეო უწყების ხელმძღვანელის ამ განცხადებას უნგრეთის საგარეო საქმეთა მინისტრი, პიტერ სიიარტო ეხმაურება.

„ნავთობსადენზე თავდასხმა, რომლის გარეშეც უნგრეთისთვის ნავთობის მიწოდება შეუძლებელია კონსტრუქციული დიალოგის ნაწილია?“- წერს სიიარტო.