უკრაინის პრეზიდენტი, ვოლოდიმირ ზელენსკი „მსურველთა კოალიციის“ შეხვედრაში მიიღებს მონაწილეობას, - ამის შესახებ ინფორმაციას Sky News-ი საფრანგეთის პრეზიდენტის ადმინისტრაციაზე დაყრდნობით ავრცელებს.

ელისეის სასახლის ცნობით, „მსურველთა კოალიციის“ შეხვედრა ხუთშაბათს, 4 სექტემბერს პარიზში გაიმართება და მას საფრანგეთის პრეზიდენტი, ემანუელ მაკრონი და დიდი ბრიტანეთის პრემიერ-მინისტრი, კირ სტარმერი უხელმძღვანელებენ.

შეხვედრა ჰიბრიდულ ფორმატში ჩატარდება და ჯერჯერობით უცნობია უკრაინის პრეზიდენტი, ვოლოდიმირ ზელენსკი პარიზში ჩავა თუ არა.

ასევე, მედია აღნიშნავს, რომ შეხვედრაში აშშ-ის პრეზიდენტის, დონალდ ტრამპის მონაწილეობა ნაკლებად სავარაუდოა.

„სახელმწიფოებისა და მთავრობების მეთაურები განიხილავენ ბოლო კვირების განმავლობაში უკრაინის უსაფრთხოების გარანტიების შესახებ გატარებულ სამუშაოებს და შეაფასებენ რუსეთის ქცევასთან დაკავშირებულ შედეგებს, რომელიც მშვიდობაზე უარს ამბობს“, - აცხადებს ელისეის სასახლე.