პრეზიდენტმა ტრამპმა ბოლო ნახევარი წლის განმავლობაში დიდი დრო და ძალისხმევა დახარჯა მშვიდობის დასამყარებლად. რუსეთის საგარეო საქმეთა მინისტრისგან კი პასუხად იღებს შემდეგს: ძველი ულტიმატუმების ახალ ნაკრებს, - ამის შესახებ უკრაინის საგარეო საქმეთა მინისტრი, ანდრეი სიბიგა სოციალურ პლატფორმა X-ზე წერს.

„რუსეთმა არ შეცვალა თავისი აგრესიული მიზნები და არ აჩვენებს მზადყოფნის ნიშნებს შინაარსიანი მოლაპარაკებებისთვის. პირიქით, მათი ულტიმატუმები კიდევ უფრო აბსურდული ხდება. ეს ადასტურებს, რომ აგრესორის მადა მხოლოდ მაშინ იზრდება, როდესაც ზეწოლასა და ძალას არ აწყდება. დროა, რუსეთის საომარ მანქანას ახალი მკაცრი სანქციებით დავარტყათ და მოსკოვი გამოვაფხიზლოთ“, - წერს სიბიგა.

უკრაინის საგარეო უწყების ხელმძღვანელი ეხმაურება რუსეთის საგარეო საქმეთა მინისტრის, სერგეი ლავროვის ინტერვიუს ინდონეზიურ გამოცემასთან, სადაც მან განაცხადა, რომ „მდგრადი მშვიდობის მისაღწევად საჭიროა საერთაშორისო სამართლებრივი გზით იმ ახალი ტერიტორიული რეალობის აღიარება და გაფორმება, რომელიც წარმოიქმნა რეფერენდუმის შემდეგ რუსეთთან ყირიმის, სევასტოპოლის, დონეცკის სახალხო რესპუბლიკის, ლუგანსკის სახალხო რესპუბლიკის, ზაპორჟიეასა და ხერსონის რეგიონების მიერთების შედეგად“.