„ერთიანი ნაციონალური მოძრაობის“ ოფისში პოლიტიკური საბჭოს სხდომა მიმდინარეობს.

როგორც სხდომის დაწყებამდე პოლიტსაბჭოს თავმჯდომარემ, ლევან ხაბეიშვილმა ჟურნალისტებთან განაცხადა, სხდომაზე განიხილება პარტიის სტრატეგია და გეგმა, რომლის შემდეგ საზოგადოება 4 ოქტომბრის აქციასთან დაკავშირებით ოფიციალურ პოზიციას მოისმენს.

„იკრიბება „ნაციონალური მოძრაობის“ პოლიტიკური საბჭო. ჩვენ განვიხილავთ პარტიის სტრატეგიას, გეგმას და 4 ოქტომბრის გამარჯვების დღესთან დაკავშირებით პარტიას ოფიციალური პოზიცია ექნება. ვიმსჯელებთ, ვითათბირებთ, ერთმანეთს გავუზიარებთ პოზიციებს და საბოლოოდ, საზოგადოებას დღეს შეჯერებული პოზიცია ექნება“, - განმარტა ლევან ხაბეიშვილმა.

ამასთან, პარტიის ერთ-ერთი ლიდერის, ანა წითლიძის განცხადებით, პარტიის ერთ-ერთ მიზანს 4 ოქტომბერს მასშტაბური აქცია წარმოადგენს.

„დღეს პოლიტსაბჭო ძალიან ბევრ საკითხზე იმსჯელებს, მათ შორის 4 ოქტომბერთან დაკავშირებით. ასევე, იმ საკითხებთან დაკავშირებით, რომელიც დღეს პოლიტიკურად აქტიურია, მაგრამ ჩვენი მიზანია სწორედ 4 ოქტომბრის ძალიან დიდი საპროტესტო აქცია, თუმცა ცხადია, ეს აქცია ხელს არ უშლის მანამდე დაგეგმილ ძალიან ბევრ აქციას, სადაც „ერთიანი ნაციონალური მოძრაობა“, ერთ-ერთი მთავარი ორგანიზატორი და მონაწილე იქნება“, - აღნიშნა წითლიძემ.