თბილისში, მელიქიშვილის გამზირზე გუშინ მომხდარი დაპირისპირების დროს დაშავებულებიდან 4 მოქალაქეს ინგოროყვას კლინიკაში გაეწია დახმარება.

როგორც კლინიკის კლინიკურმა დირექტორმა, პროფესორმა კახა ჭელიძემ ჟურნალისტებს განუცხადა, 2 პაციენტის მდგომარეობა არ მოითხოვდა ჰოსპიტალიზაციას და ისინი კლინიკიდან გაეწერნენ, ხოლო ორის ჯანმრთელობის მდგომარეობა დამაკმაყოფილებელია.

„4 პაციენტი შემოვიდა, აქედან 2 იყო თვითდინებით. შესაბამისად, ამ თვითდინებით შემოსული პაციენტების მდგომარეობა არ მოითხოვდა ჰოსპიტალიზაციას, მსუბუქი დაზიანებების გამო. რაც შეეხება 2 ჰოსპიტალიზებულ პაციენტს, მათი მდგომარეობა შემოსვლის მომენტშიც და ახლაც დაკმაყოფილებულია, მიმდინარეობს დაკვირვება“, -განაცხადა კახა ჭელიძემ.

შეგახსენებთ, გუშინ, მელიქიშვილის გამზირზე, კახა კალაძის საარჩევნო შტაბთან ხმაური და დაპირისპირება იყო. აქციის მონაწილეების განცხადებით, მათ „ქართული ოცნების“ ახალგაზრდული ფრთის წარმომადგენლები ფიზიკურად გაუსწორდნენ. ფიზიკური დაპირისპირებისას აქციის 10-ზე მეტი მონაწილე დაშავდა, მათ შორის არიან მედიის წარმომადგენლები.