პოლონეთმა ქვეყნის ტერიტორიაზე ჩამოგდებული უპილოტო საფრენი აპარატების რუსული წარმომავლობის დამადასტურებელი მტკიცებულება არ წარმოადგინა, - ამის შესახებ რუსეთის საქმეთა დროებითმა რწმუნებულმა, ანდრეი ორდაშმა რუსულ მედიას განუცხადა.

„ჩვენ ბრალდებებს უსაფუძვლოდ მივიჩნევთ. არ არის წარმოდგენილი არანაირი მტკიცებულება იმისა, რომ ეს დრონები რუსულია“, - განაცხადა ანდრეი ორდაშმა.

მისი თქმით, მსგავსი ინციდენტების გამოცდილება იმაზე მიუთითებს, რომ პოლონელები თავიანთ სიტყვებს კონკრეტული ფაქტებით არ დაადასტურებენ. რუსი დიპლომატის მტკიცებით, დღემდე, ერთადერთი იდენტიფიცირებული რაკეტა უკრაინული აღმოჩნდა.

„რუსეთი აბსოლუტურად არ არის დაინტერესებული პოლონეთთან რაიმე სახის ესკალაციით, მაგრამ, სამწუხაროდ, ჩვენ არ შეგვიძლია იმედი გვქონდეს, რომ პოლონეთის ხელისუფლება მოგვისმენს“, - აღნიშნა ორდაშმა.

ამასთან, ცნობილი გახდა, რომ პოლონეთის საგარეო საქმეთა სამინისტრომ, ქვეყნის საჰაერო სივრცეში დრონების შეჭრის გამო, რუსეთის საქმეთა დროებითი რწმუნებული უწყებაში დაიბარა.