„გახარია საქართველოსთვის“ ერთ-ერთი ლიდერი, გიორგი შარაშიძე აცხადებს, რომ „ქართულ ოცნებას“ სურს არჩევნების დღემდე მაქსიმალურად აწიოს ტემპერატურა და ხელოვნურად გაზარდოს რადიკალიზაცია.

როგორც მან „პალიტრანიუსის“ გადაცემა „360 გრადუსში“ აღნიშნა, არჩევნების წინ „ქართული ოცნება“ ხელოვნურად ძაბავს ვითარებას.

„დღევანდელი რეჟიმის მიზანია პროტესტის მუხტის არ ჩაცხრობა. „ქართულ ოცნებას“ სურს არჩევნების დღემდე მაქსიმალურად აწიოს ტემპერატურა და ხელოვნურად გაზარდოს რადიკალიზაცია. „ოცნება“ ხელოვნურად ძაბავს ვითარებას არჩევნების წინ. ასე იყო 2024 წლის საპარლამენტო არჩევნების წინ. 2021 წლის თვითმმართველობის არჩევნების წინ, რომელიც სააკაშვილის შემოსვლით დაგვირგვინდა. „ოცნება“ ყოველთვის ასეთი ტიპის რადიკალიზაციით გადის ფონს. ამ ნაცადი ტაქტიკით „ოცნება“ ერთადერთ რამეს აკეთეს, როდესაც ზრდის დაპირისპირებას, ის ამ პოლარიზაციის ფონზე ახერხებს ამომრჩევლის მობილიზაციას. დღეს, „ოცნებას“ როგორც არასდროს სჭირდება ელექტორატის მობილიზება. ყველა ეს მოქმედება, დაჭერა, ტემპერატურის აწევა მუშაობს „ოცნებაზე“, - განაცხადა შარაშიძემ.

შარაშენიძე არ გამორიცხავს არჩევნებამდე კიდევ უფრო მეტი ადამიანი დააკავონ.

მისივე მოსაზრებით, „ქართული ოცნება“ მზად არის ყველას გაწირვისთვის, ვინც მის პოლიტიკურ ინტერესებში არ ჯდება.

„არჩევნებამდე კიდევ უფრო მეტ დაკავებებს ვნახავთ. ყველაფერი მოსალოდნელია „ოცნებისგან“. ვისაც ჩათვლიან, რომ ამ ბინძური პოლიტიკური ტაქტიკისთვის დასჭირდებათ, ნებისმიერს გაწირავენ. ბურჭულაძე ღარიბაშვილის კადრი იყო. რა თქმა უნდა, ის ღარიბაშვილის გარეშე ასეთი დონის კორუფციას ვერ გაბედავდა. მეტიც, „ოცნებაში“ არის ათეულობით მაღალი თანამდებობის პირი, რომლებსაც ეცინებათ იმ თანხებზე, რასაც კორუფციულ სკანდალს ეძახიან. გაცილებით მეტი აქვთ მითვისებული. მათთვის ნახევარი მილიონი ევრო არაფერია.

შეიძლება გადავიდნენ საკუთარი გუნდის წევრებზეც, ამიტომ არ არის გამორიცხული ირაკლი ღარიბაშვილიც [დააკავონ]. ერთი მხრივ, ბურჭულაძეს იჭერდე კორუფციის ბრალდებით და კალაძე გყავდეს თბილისის მერად მესამე ვადით არჩეული, ეს არის პარადოქსი“,- განაცხადა შარაშიძემ.