ნატო-ს ტერიტორიის ყოველ სანტიმეტრს დავიცავთ, - ამის შესახებ გაერო-ში აშშ-ის ელჩის მოვალეობის შემსრულებელმა, დოროთი შიმ უშიშროების საბჭოში რუსეთის მიერ პოლონეთის საჰაერო სივრცის დარღვევის შესახებ გამართულ დებატებზე სიტყვით გამოსვლისას განაცხადა.

მისი თქმით, „საჰაერო სივრცის შემაშფოთებელი დარღვევების წინაშე აშშ ნატო-ს მოკავშირეების გვერდით დგას“.

„დარწმუნებულები იყავით, რომ ნატო-ს ტერიტორიის ყოველ სანტიმეტრს დავიცავთ. ეს ინციდენტი ხელს უშლის იმ ძალისხმევას, რომელიც აშშ-მა ბოლო კვირების განმავლობაში ომის დასასრულებლად გაიღო“, - აღნიშნა აშშ-ის ელჩმა.

გაერო-ში რუსეთის მუდმივმა წარმომადგენელმა, ვასილი ნებენზიამ განაცხადა, რომ „პოლონეთის ტერიტორიაზე სამიზნეები არ ყოფილა“.

„დრონების მოქმედების რადიუსი 700 კილომეტრს არ აღემატებოდა, ამიტომ ფიზიკურად შეუძლებელია, რომ რომელიმე მათგანი პოლონეთის ტერიტორიამდე მიღწევას შეძლებდა“, - განაცხადა რუსეთის წარმომადგენელმა.

უშიშროების საბჭოში სიტყვით გამოსვლისას პოლონეთის სახელმწიფო მდივანმა, მარსინ ბოსაცკიმ აღნიშნა, რომ რუსული დრონების პოლონეთის საჰაერო სივრცეში შეჭრა „შეცდომა არ ყოფილა“.