თბილისის საქალაქო სასამართლოში თავდაცვის ყოფილი მინისტრის, ჯუანშერ ბურჭულაძის ბრალდების საქმეზე პროცესი მიმდინარეობს.

სხდომაზე ბურჭულაძისთვის აღკვეთის ღონისძიების შეფარდებაზე იმსჯელებენ.

როგორც ცნობილია, სახელმწიფო ბრალდება აპირებს, მოსამართლეს ბურჭულაძის მიმართ პატიმრობის გამოყენების შუამდგომლობით მიმართოს.

სხდომას ბრალდებული ყოფილი მინისტრი, ჯუანშერ ბურჭულაძეც ესწრება. საქმეს მოსამართლე ეკა ბარბაქაძე განიხილავს.

ცნობისთვის, საქართველოს პროკურატურამ სახელმწიფო-პოლიტიკური თანამდებობის მქონე პირის მიერ სამსახურებრივი უფლებამოსილების ბოროტად გამოყენებისა და უკანონო შემოსავლის ლეგალიზაციის ფაქტებზე თავდაცვის ყოფილ მინისტრ, ჯუანშერ ბურჭულაძეს ბრალდება დღეს წარუდგინა.

პროკურატურის განცხადებით, დაკავებულს ბრალდება სისხლის სამართლის კოდექსის 194-ე მუხლის მე-3 ნაწილის „გ“ ქვეპუნქტით და 332-ე მუხლის მეორე ნაწილით (სახელმწიფო-პოლიტიკური თანამდებობის მქონე პირის მიერ სამსახურებრივი უფლებამოსილების ბოროტად გამოყენებისა და უკანონო შემოსავლის ლეგალიზაციის ფაქტებზე) წარედგინა, რაც სასჯელის სახედ და ზომად 12 წლამდე თავისუფლების აღკვეთას ითვალისწინებს