მე არ მჯერა რუსეთის „შეცდომების“, - ამის შესახებ ჩეხეთის საგარეო საქმეთა მინისტრი იან ლიპავსკი X-ზე წერს.

მისი თქმით, რუსეთმა ფასი უნდა გადაიხადოს ნატოს წინააღმდეგ პროვოკაციებისთვის.

"რუსეთი პროვოკაციებს აგრძელებს. გუშინ ღამით ეს რუმინეთი იყო. მე არ მჯერა რუსეთის „შეცდომების“. როგორც ნატოს მოკავშირეები, ჩვენ ფხიზლად ვრჩებით. რუსეთმა კონკრეტული ფასი უნდა გადაიხადოს ნატოს წინააღმდეგ პროვოკაციებისთვის. სწორედ ამიტომ უჭერს მხარს ჩეხეთი შემდგომ სანქციებს" , - წერს ჩეხეთის საგარეო საქმეთა მინისტრი.

ცნობისთვის, გუშინ რუმინეთის ხელისუფლებამ გაავრცელა RO-Alert შეტყობინება ტულჩეანის ოლქის ჩრდილოეთ რაიონისთვის, რომლითაც მოქალაქეებს საჰაერო ზონიდან ობიექტების ჩამოვარდნის რისკის არსებობის შესახებ აცნობა.

რუმინეთის თავდაცვის მინისტრის იონატ მოშტენანუს განცხადებით, F-16 ტიპის გამანადგურებლები, რომლებიც რუსული დრონის გამო ჰაერში აუშვეს, მის ჩამოგდებასთან ახლოს იყვნენ, თუმცა ეს ვერ მოხერხდა. რუმინეთის თავდაცვის სამინისტროს ხელმძღვანელის თქმით, რუსული დრონების თავდასხმები რუმინეთის ტერიტორიის სიახლოვეს სულ უფრო გახშირდა.