ეს რა არის? ნორმალურად უნდა გეცვათ სხდომის დარბაზში! სად ხართ, იცით?

ასე დარბაზში ვერ დაგიშვებთ!,- ამ სიტყვებით მიმართა არასრულწლოვანის მიმართ განხორციელებულ ძალადობაში ბრალდებულ მკლავჭიდელ ქალს, ხატია ვიბლიანს მოსამართლე ლელა მარიდაშვილმა.

მან სხდომის დარბაზში შემოსვლისთანავე ბრალდებულს, რომელსაც მოკლე მაისური ეცვა, შენიშვნა მისცა.

„მოიცვით რამე” - მიმართა მას მოსამართლემ, რაზეც ვიბლიანმა უპასუხა, რომ "მანქანაში დარჩა".

ამ წუთებში სხდომა, სადაც ვიბლიანის მიმართ აღკვეთის ღონისძიებაზე უნდა იმსჯელონ, შეჩერებულია.

ცნობისთვის, ხატია ვიბლიანს პროკურატურამ წინასწარი შეცნობით არასრულწლოვანის მიმართ განხორციელებულ ძალადობის ფაქტზე წარუდგინა ბრალდება.

გამოძიების ინფორმაციით, მიმდინარე წლის 11 სექტემბერს, თბილისში, ერთ-ერთ მაღაზიაში ბრალდებულმა ვიბლიანმა ფიზიკური შეურაცხყოფა მიაყენა არასრულწლოვანს, შემდეგ კი მაღაზიის მიმდებარედ გააგრძელა მასზე ფიზიკური ძალადობა.