ამ ქვეყანაში არ არსებობს არც სასამართლო, არც მოსამართლე, რომელიც სამართლიან გადაწყვეტილებას მიიღებს, შესაბამისად, ელენე ხოშტარიას გადაწყვეტილება, რომ არ დაესწროს სასამართლო პროცესს, მიმაჩნია სწორად,- ამის შესახებ „კოალიცია ცვლილების” წევრმა გიორგი ბუტიკაშვილმა დროებითი მოთავსების იზოლატორთან განაცხადა, სადაც იმყოფება კოალიციის დაკავებული ერთ-ერთი ლიდერი, ელენე ხოშტარია.

მისი თქმით, „სასამართლო ფარსში” მონაწილეობის მიღება თავის მოტყუებაა.

„ეს არის ფარსი, რაც „ქართულმა ოცნებამ” დადგა. როგორც საარჩევნო ფარსი არსებობს, ასევე არსებობს სასამართლო ფარსი, რომელიც, ფაქტობრივად, არ წარმოადგენს სამართალს და სამართლიანობას, ამიტომ ამ პროცესებში ნებისმიერი თანამონაწილეობა არის თავის მოტყუება და ივანიშვილის რეჟიმისთვის ლეგიტიმაციის მინიჭება, ფარსში თანამონაწილეობა.

მეორე საკითხი, რაც მნიშვნელოვანია და რაც ელენეს ფაქტორითაც გამოჩნდა, ივანიშვილმა უკვე დაიწყო იდენტურად იმ მეთოდების გამეორება, რაც რუსეთში იყო. კარგად გვახსოვს ომის დაწყების დროს, როგორ დააკავეს რუსეთში ადამიანები უბრალოდ, სუფთა ფურცლის [ხელში დაჭერის] გამო. იგივე არის ამ შემთხვევაში, ბანერზე მარკერით მინაწერის გამო აკავებს ადამიანს და 5 წლამდე სასჯელით ემუქრება“,- განაცხადა ბუტიკაშვილმა.

მან ასევე ისაუბრა 4 ოქტომბერთან დაკავშირებით. ბუტიკაშვილის თქმით, ნებისმიერი ხალხმრავალი პროტესტი მნიშვნელოვანია.

„ივანიშვილი ნებისმიერ დროს შეიძლება აღმოჩნდეს სიურპრიზში, ვინაიდან თვითონ დაიწყო საკუთარი შვილების ჭამა და ჩვენ ვნახეთ, როგორ დასდევს „ქართული ოცნების” ყოფილ წევრებს. ამას მას შიში აკეთებინებს, რითაც შეპყრობილია „ქართული ოცნება” და განსაკუთრებით ივანიშვილი. ამიტომ, ნებისმიერი პროტესტი, რომელიც იქნება ხალხმრავალი, არის მნიშვნელოვანი. ნებისმიერი პროტესტი, რომელიც იქნება 4 ოქტომბერს ან მის მერე არის მნიშვნელოვანი. საზოგადოებამ უნდა იცოდეს, რომ ჩვენი გამარჯვება არის სტაბილურობაში, თანმიმდევრულობასა და არ თანამშრომლობაში“,- განაცხადა ბუტიკაშვილმა.