აშშ-მა და ყაზახეთმა ლოკომოტივების მიწოდების შესახებ 4.2 მილიარდი დოლარის ღირებულების შეთანხმებას მიაღწიეს, - ინფორმაციას Reuters-ი აშშ-ის ვაჭრობის დეპარტამენტზე დაყრდნობით ავრცელებს.

აშშ-ის ვაჭრობის დეპარტამენტის ცნობით, ლოკომოტივების ნაწილების მწარმოებელი ამერიკული კომპანია Wabtec-ი მომდევნო ათი წლის განმავლობაში ყაზახეთის რკინიგზის ეროვნულ კომპანიას 300 ლოკომოტივს მიაწვდის.

აშშ-ის ვაჭრობის მდივანმა, ჰოვარდ ლუტნიკმა განაცხადა, რომ შეთანხმება აშშ-ისა და ყაზახეთის პრეზიდენტებს, დონალდ ტრამპსა და კასიმ-ჟომარტ ტოკაევს შორის სატელეფონო საუბრის შემდეგ გაფორმდა.

„აღნიშნული ლოკომოტივები, ევროპასა და აზიას შორის კავშირს გააძლიერებენ, შუა დერეფანს დააკავშირებენ, ცენტრში კი ამერიკული ტექნოლოგია იქნება“, - აღნიშნა ლუტნიკმა.