გაქსუებული ზოგიერთი ევროპელი ბიუროკრატი, დაცლილია სამართლიანობისგან, არანაირი კავშირი არ აქვთ ევროპასთან, ღირებულებებთან. მათი განცხადებები გაჯერებულია პოლიტიკური ნარატივებით, ეს ყველაფერი ტყუილზეა დაფუძნებული, ცილისწამებაზე. აგრძელებენ მუქარის შემცველ განცხადებებს,- ასე გამოეხმაურა დედაქალაქის მერი, „ქართული ოცნების“ გენერალური მდივანი კახა კალაძე ევროსაბჭოს საპარლამენტო ასამბლეაში გამართულ ბრიფინგზე გაკეთებულ განცხადებებს, რომელიც საქართველოს შეეხებოდა.

როგორც კალაძე აღნიშნავს, „ეს ადამიანები 2012 წლამდე პერიოდს დემოკრატიის შუქურად მოიხსენიებდნენ“.

„გაქსუებული ზოგიერთი ევროპელი ბიუროკრატი, დაცლილია სამართლიანობისგან, არანაირი კავშირი არ აქვთ არც ევროპასთან, ღირებულებებთან. მთელი მათი განცხადებები გაჯერებულია პოლიტიკური ნარატივებით, ეს ყველაფერი ტყუილზეა დაფუძნებული, ცილისწამებაზე. აგრძელებენ მუქარის შემცველ განცხადებებს.

თან ისევ ის ადამიანები, რომლებიც 2012 წლამდე პერიოდს დემოკრატიის შუქურად მოიხსენიებდნენ. ამას ხალხი ხედავს, საზოგადოება ამას ხედავს. იმიტომ არიან გაფარჩაკებულები, გაუბედურებულები. არანაირი ნდობა, თანადგომა. ყველაფრისაგან დაცლილები არიან, შინაარსობრივად დაცლილები არიან “,-აღნიშნა კალაძემ.

ამასთან, კახა კალაძეს კითხვა დაუსვეს მოლდოვის არჩევნებთან დაკავშირებით. კითხვაზე, მიულოცავს თუ არა მაია სანდუს არჩევნებში გამარჯვებას, კალაძე პასუხობს: „სად იმყოფებიან?! სად არიან საერთოდ - დსთ-ში“.

ჟურნალისტის რეპლიკაზე, რომ მოლდოვამ დსთ-ს დატოვების პროცედურა უკვე დაიწყო, კალაძემ უპასუხა: "კარგია, წარმატებები".

ცნობისთვის, გუშინ ევროსაბჭოს საპარლამენტო ასამბლეაში გამართულ ბრიფინგზე გაერთიანებული სამეფოს პარლამენტის წევრმა, ჯეიმს მაკკლირმა განაცხადა, რომ საქართველოში არსებული მდგომარეობა მიუღებელია და ის მოუწოდებს "ქართულ ოცნებას", შეწყვიტოს "უკუსვლა ავტორიტარიზმისაკენ".

ამასთან, გერმანელმა პარლამენტარმა, "ქრისტიან-დემოკრატიული" პარტიიდან, კნუტ აბრაჰამმა განაცხადა, რომ ოპოზიციის დევნა, მათი ლიდერების დაპატიმრება, უბრალოდ მიუღებელი და აბსოლუტურად დაუშვებელია. გერმანელი პარლამენტარის თქმით, მთავარი არის სამართლიანი და თავისუფალი არჩევნები და ყველა პოლიტიკური პატიმრის დაუყოვნებლივი გათავისუფლება.

რაც შეეხება არჩევნებს, მოლდოვის საპარლამენტო არჩევნებში ხმების 100%-ის დათვლის შედეგად მაია სანდუს პარტიამ გაიმარჯვა. მეორე ადგილზე 24.18%-ით „პატრიოტული ბლოკი“ გავიდა, რომელსაც ქვეყნის ყოფილი პრეზიდენტი, იგორ დოდონი ხელმძღვანელობს.