პოლიტიკური „კანიბალიზმით“ დაბოლოვდა ეს 13 წელი და „კრონოსი“ თავის შვილებს ჭამს, - ასე შეაფასა „ლელოს-ძლიერი საქართველოს“ წევრმა, თაზო დათუნაშვილმა „ქართული ოცნების“ მმართველობის 13 წელი.

როგორც მან განაცხადა, „ქართული ოცნება“ იზოლაციაშია მოქცეული და ქვეყანაში დემოკრატიის დასამარებას ცდილობს.

„პოლიტიკური თვალსაზრისით არაფერი აფასებს და კრავს ივანიშვილის მმართველობის 13 წელს ისე კარგად, როგორც იმ კაცის მდგომარეობა, ვინც რამდენიმე წლის წინ მგზნებარე სახით და ვასალური მლიქვნელობით „ბიძინობას“ ულოცავდა მთელ საქართველოს გაყალბებული არჩევნების შემდეგ. ახლა სად არის ეგ კაცი, ირაკლი ღარიბაშვილი? რა დღეშია? რას უშვრება თავად ბიძინა და „ბიძინობა“, ეს ყველაზე კარგად ასახავს, თუ რა არის ეს 13 წელი. ჩვენმა ქვეყანამ და ხალხმა მოახერხა და დემოკრატიული წესით ხელისუფლების ცვლილება ისწავლა და შეძლო. ამ დიდი იმედის ჩასახვიდან და დიდი გამარჯვებიდან 13 წლის თავზე, მივედით ქვეყანაში, სადაც მთვრალი დუგინი არის ხელისუფლების მთავარი „მოლაპარაკე თავი“, სადაც იზოლაციონიზმი გახდა სახელმწიფო პოლიტიკა და დემოკრატიის დასამარებით არის დაკავებული მთელი სახელისუფლებო ვერტიკალი. რაც ყველაზე მნიშვნელოვანია, პოლიტიკური „კანიბალიზმით“ დაბოლოვდა ეს 13 წელი და „კრონოსი“ თავის შვილებს ჭამს, - განაცხადა დათუნაშვილმა.