„გახარია საქართველოსთვის“ ერთ-ერთი ლიდერის, თბილისის საკრებულოს თავმჯდომარეობის კანდიდატის, დიღმის მაჟორიტარობის კანდიდატის გიორგი შარაშიძის განცხადებით, დიღმის ტყე-პარკი არის რეალური საფრთხის წინაშე, რადგან ტერიტორიის სამშენებლო მიზნებისთვის გამოყენების საფრთხე არსებობს.

როგორც გიორგი შარაშიძემ განაცხადა, თბილისის მერობის კანდიდატის კახა კალაძისთვის ხმის მიცემა ნიშნავს იმას, რომ დიღმის ტყე-პარკს არასდროს დაუბრუნდება სარეკრეაციო ზონის სტატუსი.

"დიღმის ტყე-პარკი არის რეალური საფრთხის წინაშე. თბილისის მერიამ, „ოცნებამ“ და კალაძემ, რომელიც 8 წლის განმავლობაში იყო თბილისის მერი, არაფერი გააკეთა იმისთვის, რომ დიღმის ტყე-პარკის გარკვეული ნაწილი, საუბარია 15300 კვადრატულ მეტრზე, რომელსაც ჯერ კიდევ აქვს საქმიანი, კომერციული საზოგადოებრივი ზონის სტატუსი, არ შეეცვალა ეს სტატუსი, არ დაებრუნებინა ლანდშაფტურ-სარეკრეაციო ზონის სტატუსი, რითაც ერთხელ და სამუდამოდ წერტილს დაუსვამდა იმ შესაძლო მოსალოდნელ მშენებლობებს და ამ უნიკალური ტყე-პარკის კომერციული მიზნებისთვის გამოყენებას, რაც ყველაზე მეტად აწუხებთ თბილისელებს, განსაკუთრებით, დიღმის მასივის მოსახლეობას.

როგორც დიღმის მასივისთვის, ასევე თბილისის ძალიან დიდი ნაწილისთვის დიღმის ტყე-პარკი არის ფილტვები. ეს არის უნიკალური სარეკრეაციო ზონა, ნამდვილი ტყე ქალაქის ცენტრში. ამიტომ აქ დაუშვებელია ნებისმიერი ტიპის მშენებლობა და ჩვენი მოთხოვნა არის ის, რომ აუცილებლად მოხდეს ამ მიწების კერძო მფლობელებისგან გამოსყიდვა, ადგილმონაცვლეობა. ამ ტერიტორიების, რაც შეადგენს 10%-ზე მეტს დიღმის ტყე-პარკისა, დაბრუნება ლანდშაფტურ-სარეკრეაციო ზონის სტატუსის.

მე ვაფრთხილებ კიდევ ერთხელ თბილისელებს, განსაკუთრებით დიღმის მასივის მოსახლეობას, კახა კალაძისთვის ხმის მიცემა ნიშნავს იმას, რომ დიღმის ტყე-პარკს არასდროს დაუბრუნდება სარეკრეაციო ზონის სტატუსი და აქ მუდმივად იარსებებს ამ ტერიტორიის სამშენებლო მიზნებისთვის გამოყენების საფრთხე.

ამიტომ, ყველამ უნდა მიიღოს გონივრული გადაწყვეტილება, უარი უნდა უთხრას „ოცნებას“, კორუმპირებულ კალაძეს და აირჩიოს „გახარია საქართველოსთვის“, რადგან ჩვენი ერთ-ერთი მთავარი დაპირება არის ის, რომ აუცილებლად მოვახდენთ ყველა სარეკრეაციო ზონის გამოსყიდვას კერძო მფლობელებისგან და ამ მწვანე ტერიტორიას დავუბრუნებთ თბილისს“, - განაცხადა შარაშიძემ.