„ლელო-ძლიერი საქართველო“ – განვითარებულმა პროცესებმა ცხადყო, რომ ბოიკოტის კამპანია იყო კრიტიკული შეცდომა, რომელმაც კიდევ ერთხელ შესაძლებლობა მისცა „ქართულ ოცნებას“, მიეტაცებინა ყველა ოპოზიციური პარტიის ხმა, ვინც არ შემოვიდა ამ ბრძოლაში
„ლელო-ძლიერი საქართველო“ მადლობას უხდის საქართველოს თითოეულ მოქალაქეს, ვინც ენდო და „ამ უთანასწორო ბრძოლაში გაჰყვა ამ არჩევნებში”.
როგორც განცხადებაშია ნათქვამი, განვითარებულმა პროცესებმა ცხადყო, რომ არჩევნებამდე 8 თვით ადრე დაწყებული ბოიკოტის კამპანია იყო კრიტიკული შეცდომა ოპოზიციის იმ ლიდერების მხრიდან, რომლებიც ამ პროცესის სათავეებთან იდგნენ და რამაც გავლენა მოახდინა საზოგადოებრივი აზრის არასწორად ფორმირებაზე და შესაბამისად, მთელ პოლიტიკურ პროცესზე, რომელმაც კიდევ ერთხელ შესაძლებლობა მისცა "ქართულ ოცნებას" მიეტაცებინა ყველა იმ ოპოზიციური პარტიის ხმა, ვინც არ შემოვიდა ამ ბრძოლაში.
„გვსურს მადლობა გადავუხადოთ საქართველოს თითოეულ მოქალაქეს, ვინც გვენდო და ამ უთანასწორო ბრძოლაში გამოგვყვა ამ არჩევნებში, მიუხედავად დიდი წნეხისა. მათ ვინც გამოგვყვა რწმენით, რომ არჩევნებით და მტკიცე, ქუჩის მშვიდობიანი პროტესტით ხელისუფლების ცვლილება არის ის ერთადერთი და უალტერნატივო გზა, რომელსაც "ძლიერი საქართველო-ლელო" მიჰყვება. ჩვენ ღრმად გვწამს, რომ ჩვენი ქვეყნის დემოკრატიული განვითარებისთვის ეს პრინციპული და სწორი გადაწყვეტილებაა.
რუსული ავტორიტარული რეჟიმის პირობებში ეს რთული ამოცანაა, თუმცა ჩვენი სტრატეგია ერთადერთ სწორ გადაწყვეტილებად მიგვაჩნდა ამ პროცესის დასაწყისში და ასე გვწამს ახლაც - ეს იყო სახელმწიფოებრივად სწორი ხედვა.
საარჩევნო პროცესი, დღეს ურთულესი იყო - უთანასწორო ბრძოლის ველი, რუსული რეჟიმის პირობებში. დღეს ჩვენ ვნახეთ სისტემური გაყალბების ფაქტები - "კარუსელი", მოსყიდვა და მუქარით ამომრჩევლის ნებაზე გავლენის მოხდენა.
ჩვენი ამოცანა იყო არ მიგვეცა "ქართული ოცნებისთვის" საქართველოს ყველა ქალაქსა და სოფელში ძალაუფლების მიტაცებისა და გამყარების საშუალება. რუსული რეჟიმის მიზანი იყო დემოკრატიული პროევროპული პარტიების პროცესიდან გათიშვა და ამით თბილისისა და საქართველოს რეგიონების სრულად მიტაცება.
განვითარებულმა პროცესებმა ცხადყო, რომ არჩევნებამდე 8 თვით ადრე დაწყებული ბოიკოტის კამპანია იყო კრიტიკული შეცდომა ოპოზიციის იმ ლიდერების მხრიდან, რომლებიც ამ პროცესის სათავეებთან იდგნენ. ამ განაცხადმა გავლენა მოახდინა საზოგადოებრივი აზრის არასწორად ფორმირებაზე და შესაბამისად, მთელ პოლიტიკურ პროცესზე, რომელმაც კიდევ ერთხელ შესაძლებლობა მისცა "ქართულ ოცნებას" მიეტაცებინა ყველა იმ ოპოზიციური პარტიის ხმა, ვინც არ შემოვიდა ამ ბრძოლაში.
ჩვენს მთავარ ამოცანად კვლავ რჩება ახალი საპარლამენტო არჩევნების მიღწევა და პოლიტპატიმრების გათავისუფლება, რასაც კონსტიტუციური გზით და უკომპრომისო ბრძოლით მივაღწევთ!“, - ნათქვამია „ლელო-ძლიერი საქართველოს“ განცხადებაში.
