4 ოქტომბრის აქციის ფარგლებში დაკავებული ევა შაშვიაშვილის ადვოკატის, ამირან ბურდულის განცხადებით, დაცვის მხარე ფსიქიატრიული ექსპერტიზის დანიშვნას მოითხოვს, რადგან დაკავებულს პრობლემები აქვს. ადვოკატმა ზაჰესის დროებითი მოთავსების იზოლატორში მისი დაცვის ქვეშ მყოფი მოინახულა. როგორც მან ჟურნალისტებს განუცხადა, ევა შაშვიაშვილს ჯგუფურ ძალადობაში მონაწილეობას ედავებიან, თუმცა თავად დუმილის უფლებას იყენებს.

„ალბათ, ფსიქიატრიული ექსპერტიზის დანიშვნასაც მოვითხოვთ, პრობლემები აქვს მასაც და ოჯახის წევრსაც, მძიმედ დაავადებული შვილი ჰყავს. დუმილის უფლებას ირჩევს. ბრალის დადგენილებაში წერია - „ჯგუფურ ძალადობაში მონაწილეობა". თვითონ ამბობს, ერთი ქვა ვისროლეო, მეტი არაო. ძალიან ვრცელია საქმის მასალა და მე არ გავცნობივარ, დაახლოებით 1000 გვერდია. სხვა ფიგურანტებს არ იცნობს, როგორც მითხრა. ვინაიდან ოჯახური მდგომარეობა მძიმე აქვს, ალბათ, აღკვეთის ღონისძიების სახით გირაოს თანხით შეფარდებას მოვითხოვ. მოგეხსენებათ, მინიმალური 1000 ლარია, მაგრამ მეტს მოვითხოვ“, - განაცხადა ადვოკატმა, ამირან ბურდულმა.

ცნობისთვის, ათონელის სასახლესთან განვითარებულ მოვლენებში მონაწილე პირების მიმართ გამოძიება სისხლის სამართლის კოდექსის 317-ე, 222-ე, 225-ე და 187-ე მუხლებით მიმდინარეობს.

აღნიშნული გამოძიების ფარგლებში 23 ადამიანი დააკავეს, მათ შორის, 18 სამოქალაქო აქტივისტია, 5-ს კი მათ შორის, აქციის ორგანიზატორობა ედება ბრალად. შსს-ს ცნობით, 3 პირი მიმალვაში იმყოფება.